बस लोकल, अनुभूति डिलक्स

स्वनिगःया सार्वजनिक यातायातय् छिगु यात्रा गथे जुइ ? अथवा छिं यात्रा यानादीगु इलय् गज्याःगु अनुभूति यानादी ? खचाखच यात्रु, घ्वात्तुमत्तु ध्वानाः, सिटया क्षमता स्वयां अप्वः यात्रु, अझ उकिसनं दुनेथ्यंकं कोचाकोच जुइक यात्रु तयेगु, उलिं नं मगानाः चालकं सहचालकयात यात्रु थप यायेत घ्वात्तुघ्वानाच्वनीगु ला छखे हे तिनि ।

बसय् दुने दुहां वनेवं बरां, सन्त्रासि, केरा ख्वला वांछ्वया तइगु चुरोट बट्टा, खैनी, पान पराग लःया सिसि व धू नं उतिकं दयाच्वनीगु थ्व झीमध्ये यक्वसिनं फयेमाःगु समस्या खः । तर थौंकन्हय् येँय् नं ख्वपया रुटय् चले जुइगु छगः बस अले उकिया चालक दु, गुम्ह चालक मखसे व स्वयां नं अप्वः छम्ह सफाइ अभियानकर्मि जकं खःला धइगु यक्वसिनं तायेकेफु ।

येँया बागबजारय् च्वंगु बसपार्कं गाडी छुटे जुइ न्ह्यः उम्ह चालकं थःगु सिटपाखे चिकिचा ग्वःगु माइक लिकयाः उद्घोष यानादी, ‘छिकपिं सकसितं लसकुस दु, बसय् तयातःगु सुचं व प्लेकार्ड स्वयादिसँ । गाडीइ लः, चाउचाउ नं व्यवस्था दु । सुयातं माःसा ध्यबा पुलाः न्यानादी फइ । तर फोहर लुखाय् च्वंगु डस्टविनय् जक तयादिसँ । सुभाय् ।’

चालकं थुलि धयाच्वनीगु इलय् यात्रु बसय् दुहां वयेवं लुखा थः हे बन्द जुइ । बसय् सहचालक तयातःगु मदु । न्हिउख्वाः सहितया चालकं उकथं लसकुस यासें जानकारी बिउगु न्यनेबलय् गुलिसिनं थ्व तायेकेफु कि थ्व गनं सुविधासहितया डिलक्स बस जकं खःला कि ? अले थः गनं पर्यटकीय लागाय् चाः हिउ वने त्यनागु खःला ? तर अथे मखु ।

थ्व सामान्य मिनिबस हे खः । बा ४ ख २७२४ नं.या, गुगु बस येँया बागबजारं न्हूगु थिमि, ख्वप क्यान्सर अस्पताल जुयाः ब्यासीया रुटय् चले जुया वयाच्वंगु दु । थुगु बसया चालक खः ख्वपया हे गंगाराम खाइजु । निगू दशक स्वयां ताःहाकःगु अनुभवलिपा वय्कलं उकथंया न्हूगु प्रयोग यानादीगु खः । सन्देशमूलक प्लेकार्डं जायाच्वंगु वय्कःया बसय् त्वनेगु लः व चाउचाउ नं उपलब्ध दु ।

नयेमाःपिं न्ह्याम्हं यात्रुं ध्यबा पुलाः न्यानाः नये फइ । तर प्लाष्टिकया सिसि, चाउचाउया खोल धाःसा बसय् वांछ्वये मदु । उकिया निंतिं बसया लुखाय् डस्टविनया व्यवस्था यानातःगु दु । वय्कःया बसया न्ह्यःने च्वंगु प्लेकार्डय् च्वयातःगु दु, ‘सिसाबुसा, कुरकुरे, लेज, बरां व मेमेगु नसाज्वलंया खोल, ख्वला, प्लाष्टिक थेंज्याःगु फोहर वस्तु डस्टविनय् तयाः थःत सभ्य नागरिकया म्हसीका बियादिसँ ।’

लः छगःया २० तका व चाउचाउ छगू प्याकेटया २० ता दामं उपलब्ध दु । थ्व बसय् चाउचाउया खोल, बरां ख्वला, थम्हं प्रयोग याःगु लः थल तयेत धकाः बसया लुखाय् कुहां वनेगु थासय् डस्टविन नं तयातःगु दु । ‘छिगु बसय् ला सहचालक मदुनि’ धकाः न्यंगु छगू न्ह्यसःया लिसलय् वय्कलं धयादिल, ‘गाडीया लुखा अटोमेटिक चाली, बन्द नं जुइ ।

गुलां मल्यायेधुंकल जिं सहचालक तयेगु त्वःता बियागु । सहचालक तयेबलय् लुखाय् यात्रुत झुण्डे जुयाः यात्रा याइगु, लुखाय् हे अप्वः हुल जुइगु, दुर्घटना नं जुइ फुगुलिं जिं स्वचालित लुखाया छ्यलागु खः । खाइजुया थुगु बसय् सन्देशमूलक मेमेगु नं आपालं प्लेकार्ड तयातःगु दु । गथेकि ‘गाडी पिहां वइगु फोहर धूयात लाक्वपाक्व वांमछ्वये, प्रत्येक गाडीइ डस्टविनया प्रयोग यानादिसँ, व्यवसायी चालक–सहचालकयात इनाप यानाच्वना । सुभाय् ।’

‘गाडी भाडा थः गनं गाडी गयागु खः चालकयात धयाः बियादिसँ ।’ ‘न्यासः–द्वःछि वंगु ध्यबा दुसा खुद्राया निंतिं न्हापा हे चालकयात धयादिसँ ।’वय्कःया थ्व जानकारी व सन्देश यात्रुतय् निंतिं न्ह्यइपुसे मच्वनीगु ला खँ हे मदु । बसय् यात्रा यानाच्वंम्ह छम्ह यात्रु सुजन सुवेदीं थम्हं निक्वःखुसी उगु बसय् यात्रा यानाच्वनागु धयादिल ।

वय्कलं बसय् तयातःगु प्लेकार्ड व उकी च्वयातःगु सन्देशं थः प्रभावित जूगु नं धयादिल । अथे हे मेम्ह यात्रु निशा मगरं धयादी, ‘जितः थ्व सन्देश ब्वनागु इलय् तसकं न्ह्यइपुसे च्वन, वास्तवय् दक्वं बसय् थथे हे जुइमाःगु खः । थुकिं जिपिं थेंज्याःगु यात्रुत नं भिनेमाः ।’
चालक खाइजुं थः स्वनिगःया फोहर खनाः वाक्कदिक्क चाःगु धासें वय्कलं धयादी, ‘यदि हरेक मनुखं थःथःगु थासं सुचुकुचु यायेगु निंतिं चिधंगु जक कुतः याःसां नं बांलाइ थें जितः ताः ।’

सम्बन्धित बुखँ

LEAVE YOUR COMMENTS