ने. सं. ११४३ चौलाथ्व सप्तमी -

छेँ मापदण्डय् हयेगु निंतिं निवेदनया चाङ्ग

येँ – न्हापा दयेका तयेधुंकूगु, तर निर्माण मापदण्ड कथं मजूगु छेँयात मापदण्डय् हयेगु निंतिं येँ महानगरपालिकाय् निवेदनया चाङ्ग खायेधुंकूगु दु । स्वला न्ह्यव येँ मनपां दने सिधयेधुंकूगु, तर नियम कथं मजूगु छेँयात मापदण्डय् हयेगु निंतिं सुचं बिउगु खः । दयेके सिधयेधुंकूगु, तर नक्सा पास प्रक्रिया तकं पूमवंकुसे दयेकातःगु थज्याःगु निजी, सावजनिक व सरकारी छेँयात नक्साकथं दयेकेगु निंतिं थज्याःगु व्यवस्था हःगु खँ येँ मनपां धाःगु दु ।

येँ मनपाया सहप्रवक्ता नवराज ढकालं नगरवासीतय् निंतिं थ्व छगू ह्वःताः वयाच्वंगु धासें थ्व मौकाया सदुपयोग मजुल धाःसा यक्व मनूतय् छेँ नक्साविहीन जुइगु लिसें नक्सा पास मजूनिगु कारणं उगु छेँपाखें कायेदइगु यक्व कथंया सुविधापाखें बञ्चित जुइगु खँ नं नवराज ढकालं धयादीगु दु । नियम दुने हयेत छेँथुवाःतय्सं छेँय्या विवरण सहित यक्व ल्याखय् निवेदन पेश याये हयेधुंकूगु खँ नं ढकालं कनादीगु दु ।

दयेके क्वचायेधुंकूगु भवनयात स्वंगू वर्ग विभाजन यानाः सरल मापदण्डया आधारय् सुधार व संशोधित मापदण्डपाखें महानगरं ज्या सुरु यायेवं निवेदन बिउवःपिनि ल्याः अप्वःगु खः । वंगु असार २७ गते क्वचाःगु नगरसभापाखें स्वीकृत भवन निर्माण मापदण्ड २०७५ या आधारय् तयार याःगु कार्यविधि कथं भवन विभागं छेँथुवाःतपाखें निवेदन कायेगु सुरु याःगु खः ।

कार्यविधिइ छेँ दयेकूबलय् मापदण्ड पालना मजूगु भवनयात कैफियत विवरण उल्लेख यानाः निर्माण सम्पन्न प्रमाणपत्र बिइगु व्यवस्था यानातःगु दु ।
महानगरपालिका दुने न्हूगु दयेकेगु छेँ, तँ थप याइगु, संरचना हिलाबुला यायेगु व निर्माण सम्पन्न प्रमाणपत्र जारी यायेगु ज्यायात सरल यायेगु निंतिं थ्व व्यवस्था न्ह्यःने हःगु खः ।

यातायात आवागमन, पार्किङ्ग, खुला थाय्, भवनया अवस्था, बनावट, उपयोग, भौतिक तथा सामाजिक सुरक्षा, जःलाखःलात लिसेया सम्बन्ध थेंज्याःगु थीथी पक्षपाखें भवनयात नियमय् हयेगु कुतः जुयाच्वंगु खँ भवन निर्माण इजाजत विभागया प्रमुख रविन्द्रकुमार पौडेलं धयादिल ।

भ्वँ पूवंक दुगु नक्सा स्वीकृतया निंतिं २५ निसें ३० न्हु लगे जुइगु व निर्माण सम्पन्न प्रमाणपत्र कायेत न्हय्न्हु निसें झिन्हु तक लगे जुइगु खँ धाःगु दु ।
स्थानीय सरकार संचालन ऐनय् नक्सा स्वीकृत मयासे नियमकथं दयेकातःगु व स्वीकृत स्वयां फरक कथं दयेकातःगु छेँया निंतिं छक्वःया निंतिं विशेष व्यवस्था यायेमाःगु प्रावधान कथं येँ मनपां थ्व व्यवस्था याःगु खः ।