रोजगार सम्झौता पुनरावलोकन यायेत कार्यदल

येँ – सरकारं वैदेशिक रोजगारया निंतिं ज्यामित छ्वयाच्वनागु थीथी देशय् न्हापा यानातःगु सम्झौता व समझदारीपत्रया पुनरावलोकन याइगु जूगु दु । सोमवाः च्वंगु वैदेशिक रोजगार प्रवद्र्धन बोर्डया बैठकं न्हापा जूगु गुलिखे सम्झौता व सहमतिपत्रय् कमजोरी दुगु व गुलिखे प्रावधान नेपाली ज्यामितय् हीतया निंतिं मगाःगु खनेदुगुलिं पुनरावलोकन यायेत कार्यदल गठन यायेगु क्वःछिउगु खः । अथेहे छुं छुं देशय् ज्या याःवनीपिं ज्यामितय् सेवा व शुल्क नं सरकारं हे निर्धारण यायेगु नं क्वःछिउगु दु ।

ज्या बीगु देय्तलिसे सरकारं सम्झौता याःसां गुलिखे सम्झौताया विषय लागू मजुयाच्वंगु अवस्थाय् सोमवाः श्रम मन्त्रालयं थुपिं सम्झौता व सहमतिइ पुनरावलोकन यायेगु क्वःछिउगु खः । श्रम, रोजगार तथा सामाजिक सुरक्षा मन्त्री गोकर्ण बिष्टं धयादीगु दु, ‘न्हापाया गुलिखे सम्झौताय् सिन्डिकेटयात वैधता बीकथंया प्रावधान तयाः सम्झौता यानातःगु लुइकागु दु । उकिं न्हापाया कमीकमजोरी चिइकाः न्हूगु मापदण्ड दयेकेमाःगुलिं पुनरावलोकन यायेत्यनागु खः ।’

रोजगार प्रवद्र्धन बोर्डं दयेकूगु कार्यदलया प्रतिवेदनय् आःया समस्या व उकिया समाधानबारे पूवंक न्ह्यथनीगु व उकिया हे आधारय् न्हूगु सम्झौताया प्रस्ताव यायेत सहज जुइगु आशा यानातःगु दु ।वैदेशिक रोजगार विभागया कथं आः यानातःगु सम्झौता मध्येय् गुलिखे देशय् न्हूगु कानुन कथं दयेकेमाःगु अवस्था दुसा गुलिखे देशय् ज्यामितय् थप अधिकार सुनिश्चित यायेकथं पुनरावलोकन यायेमाःगु अवस्था दु ।

वैदेशिक रोजगार विभागया महानिर्देशक भूवनप्रसाद आचार्यं बिबिसीलिसे खँ ल्हासें धयादीगु दु, ‘कतारय् न्हूगु घरेलु श्रम ऐन वःगुलिं व हे कथं हिलेमाःगु दु । संयुक्त अरब इमिरेट्सलिसे घरेलु कामजोरया हकहित जुइकथं सम्झौता यायेमाःगु दु । थज्याःगु हिउपाः यक्व देय्तलिसे जूगु सम्झौताय् यायेमाःगु खनेदयाच्वंगु दु ।’सरकारं वैदेशिक रोजगारय् वनीपिनि सेवा व शुल्क क्वःछिइत मेगु छगू नं कार्यदल दयेकूगु खः । थ्व कार्यदलय् निःशुल्क टिकट व भिसा व्यवस्था यानातःगु न्हय्गू देय् बाहेकया मेमेगु देय्या सेवा शुल्क निर्धारण याइगु खँ मनत्री बिष्टं कनादीगु दु ।

वय्कलं बिबिसीयात धयादीगु दु, ‘सेवा शुल्क निर्धारण यायेगु सन्दर्भय् अध्ययन यानाः सिफारिश यायेत छगू कार्यदल गठन यानागु दु । गन्त्व्य देय्तय् प्रतिव्यक्ति आम्दान,ि अनया न्यूनतम पारिश्रमिक लगायतया मापदण्ड स्वयाः रोजगार गन्तव्य देय्या बर्गीकरण यानाः सेवा शुल्क तय यायेत थ्व कार्यदलं ज्या याइ ।’मन्त्रालयं कार्यदलया हे गठनया सम्झौता पुनरावलोकन यायेगु धाःसां थुकिं ज्या जुइ लाकि मजुइ धयागु खँय् धाःसा रोजगारी व्यवसायी व ज्यामितय्सं विश्वास यायेफयाच्वंगु मदु । सरकार व मन्त्रीत हिलेवं न्हून्हूगु नीतिगत निर्णय याइगु, तर ज्या धाःसा मयाइगु जुयाच्वंगुलिं आः नं थथे हे जुइगु खः ला धयागु सकसिया आशंका दु ।

सम्बन्धित बुखँ

LEAVE YOUR COMMENTS