जलपरी गौरिका

कासा ख्यलय् चूलाइगु दक्वं स्वर्ण उथें उथें खः कि भचा भचा पाः ? अझ यक्व हे पाः लाकि ? नकतिनि क्वचाःगु झिंस्वक्वःगु दक्षिण एसियाली कासा (साग) य् नेपाःया कासामितय्सं ५१ गू स्वर्ण पदक त्याकल । न्ह्यसः व हे खः, थुपिं ५१ गू स्वर्ण फुक्कं उथें खः कि मखु ? थुकिया लिसः सकसितं मययेफु, तर खास ख“ छु धाःसा थुपिं दक्वं उतिकं मजू । छुं स्वर्ण ला थज्याःगु नं दु गुकियात कयाः कुत्तुकुलाः न्यन धाःसा म्हाइपुसे जक च्वनी, न्ह्यइपुगु छुं दइमखु ।
थुपिं फुक्कया दथुइ छुं छुं स्वर्ण धाःसा खास हे दु । छुं स्वर्णया उपलब्धी गज्जब दु, अले ऐतिहासिक नं । गथेकि मिस्तय् झिद्वः मिटर दौडय् सन्तोषी श्रेष्ठं त्याकूगु स्वर्ण । अथवा मिजंतय् म्याराथनय् किरणसिंह बोगटीं हःगु स्वर्ण । अझ धाये बक्सिङय् मीनु गुरुङ व भुपेन्द्र थापां त्याकूगु स्वर्ण । जुडोय् देविका थापा व पुनम श्रेष्ठं त्याकूगु स्वर्ण नं छुं कम मजू । न भारात्तोलनय् सन्जु चौधरी व विकास थापां त्याकूगु स्वर्ण कमजोर खः । उलि जक मखु, फुटबलय् वःगु स्वर्ण नं कम मखु ।

थुपिं सकतां दथुइ नं पौडीपाखे गौरिका सिंहं त्याकूगु प्यंगू स्वर्णया ला छु जक ख“ ल्हाये ? धात्थें धायेगु खःसा ताः ई लिपा तकं आःया सागयात लुमंकेगु दकलय् बांलाःगु छतायां छता त्वह थ्व हे गौरिकाया उपलब्धी जुयाच्वनी । थौंकन्हय् वयात जलपरी धायेगु याना हयेधुंकूगु दु । पुखुलिइ जादुयी प्रदर्शन याइम्हेसित थ्वसिबें बांलाःगु नां मेता दइ नं मखु जुइ । सागया समापन ज्याझ्वलय् वं हे नेपाःया ध्वाँय् ज्वनाः मार्चपास याःगु खः, अले वया लिउलिउ मेपिं नेपाःया कासामित वःगु खः ।

छुं नं ततःधंगु कासा महोत्सवय् थःगु देसया नेतृत्व यासें थथे ध्वाँय् ब्वयेकाः वने खनीगु धयागु तसकं भाग्यया ख““ खः । गौरिका थ्वपालय् थुकिया पूर्णतः हकदार नं खः । साग क्वचायेवं सकसियां धायेगु नं याना हःगु दु, नेपाःया नम्बर १ कासामि सु खःसा व आः गौरिका हे खः । अझ दकलय् न्ह्यइपुगु ला छु धाःसा आः वइगु छुं संस्करणय् गौरिकां थुलिति हे म्हिताः क्यन धाःसा वयात लिउने लाके फइपिं तकं सुं दइमखु । आखिर गौरिका नकतिनि १७ द“ क्यंम्ह मिसामचा ला खत ।
थ्वयां न्ह्यः नेपाःया कासाख्यलय् दकलय् सफल कासामि सु खः धालकि उकिया लिसः वइगु खः– बैकुण्ठ मानन्धर, दीपक विष्ट अथवा संगीना बैद्य । विशेषतः दक्षिण एसियाली कासाया आधारय् थथे धायेगु याः । आः थुकी गौरिका नामं न्हूगु छगू नां नं वःगु दु । अझ गौरिकायात छपलाः न्ह्यःने तयाः नां काःसां छुं मपाः । गौरिकाया व्यक्तिगत प्रदर्शनया कारणं पौडीइ नेपाःया ऐतिहासिक प्रदर्शन सम्भव जुल । थुकियात अद्वितीय सफलता धाःसां जिउ ।

दकलय् तःधंगु प्रदर्शन
नेपाःया पौडीख्यःया इतिहासय् आः तक प्राप्त जूगु दकलय् तःधंगु सफलता थ्व हे खः । नेपाःया नामय् प्यंगू स्वर्ण, प्यंगू रजत व प्यंगू हे काँस्य वल । थुकी प्यंगुलिं स्वर्ण ला गौरिकाया हे जुल । अथे ला नेपाःया नामय् थ्वयां न्ह्यः नं पौडीपाखे स्वर्ण मवःगु मखु । सन् १९९९ या च्याक्वःगु दक्षिण एसियाली कासा ये“य् हे जूगु खः । उबलय् नं पौडीपाखें छगू स्वर्ण वःगु खः, मिस्तय् टिम स्पर्धाय् । तर थ्व स्वर्णया उपलब्धीयात ल्वःमंकूसां पाय्छि जुइ । उबलय् टिम स्पर्धाय् न्हाप व लिउ लाःगु टिम डिस–क्वालिफाइ यानाबिइवं नेपाःया भागय् स्वर्ण वःगु खः । उबलय् धात्थें छु जुल धकाः आः ख“ ल्हात धाःसा न्हिलेमालीगु जुइ । थ्व स्वर्ण धाथें हे ल्वःमंकेबहःगु छगू संयोग जक खः । तर गौरिकाया आःया प्रदर्शन धाःसा न्ह्याब्लें गर्व यायेबहगु खः । सन् २०१६ य् भारतय् जूगु १२ क्वःगु सागय् गौरिकां निगू रजत त्याकूगु खः । थ्व नं उबलय्या ल्याखं ऐतिहासिक प्रदर्शन हे खः । आखिर व्यक्तिगत स्पर्धाय् रजत वःगु नं दकलय् न्हापां खः ।

उबलय्या प्रदर्शनया ल्याखं गौरिका आः नं स्वर्णया हकदार मखु । छाय्धाःसा पौडी अज्याःगु छगू कासा खः, गन टाइमिङ न्ह्याब्लें दकलय् महŒवपूर्ण जुयाच्वनी । अले व हे टाइमिङया ल्याखं सुनां छु त्याकी न्हापा हे धाये फयाच्वनी । तर भारतय् जूगु व साग लिपाया स्वद“य् वं न्ह्यथनेबह जुइक सुधार याःगु दु । थ्व हे कारणं वं प्यंगू स्वर्ण त्याकल । सम्भवतः भाग्यं भचा ग्वाहालि याःगु खःसा अथवा नेपाःया पौडीं आ“ट याःगु खःसा वयागु नामय् अझ छगू स्वर्ण वयेफुगु खः ।

‘जि ला नेपाःमि खः’
प्यंगूमध्ये न्हापांगु स्वर्ण त्याकेवं गौरिकां धाःगु थथे हे खः । वया धापू खः, ‘जि ला नेपाःमि खः । जिं त्याकागु स्वर्ण नेपाःया नितिं हे खः ।’ अझ धाये थुकी दुने सुलाच्वंगु ख“ छु धाःसा गौरिकायात गथे यानाः नेपाःया म्ह्याय्मचा मखु धकाः धायेफइ ? गौरिकाया प्यंगू स्वर्णया यात्राया पूरा बाखं थनथाय् लाक हे दु । थ्व हे कारणं यानाः नं वया प्रदर्शन अझ विशेष जुयाबी । गौरिका थन हे बूम्ह खः, तर निद“ दयेवं व व वया परिवार लन्डनय् च्वंवन ।

गौरिकां पौडी म्हिते सयेकूगु नं अन हे खः । नेपाःया छगू खानदानी परिवारनाप वया स्वापू दु, गुगु परिवार छगू इलय् नेपालय् तसकं प्रभाव दुपिंमध्ये खः । विशेषतः वया मां गरिमा राणा अप्वःसिनं न्यनातःगु नां खः । एसएलसीइ बोर्ड फस्ट वःम्हया ल्याखं वयात लुमंकेगु याः । छगू इलय् वया इहिपा उब्लेया युवराजधिराज दीपेन्द्रनाप जुइत्यंगु दु धकाः नं खुब हे हल्ला जूगु खः । आखिर थ्व हल्ला हे जक जुल, गरिमां चिकित्सक पारस सिंहनाप इहिपा यात ।

उमि हे न्हापांम्ह मचाः खः, गौरिका । उमिगु परिवार लन्डनय् हे च्वनी । गौरिकां पौडीया अभ्यास नं अन हे याइ । वया सफलताया निंतिं गरिमा व पारसं तःधंगु लगानी याना वयाच्वंगु दु, अझ धाये तःधंगु त्याग हे । झीथाय् च्वनाः गौरिकां म्हितूगु खःसा ला वया आःया प्रदर्शन सम्भव तकं मजू । वया आतकया यात्राय् दक्वं खर्च याना वयाच्वंगु नं वया परिवारं हे खः, छगू कथं धायेगु खःसा गौरिकाय् नेपाःया लगानी मदु धाःसां जिउ ।

लन्डनय् गौरिकाया थःगु हे व्यक्तिगत प्रशिक्षकनिसें फिजियो तक दु । आः अनुमान यायेछिं थुकिया निंतिं गुलि खर्च जुइ धकाः ? गौरिकाया परिवारं थुकी नुगः धाःसा मस्याकू । उमित नुगलय् स्याइगु छता हे कारण खः, नेपाःया कासाख्यःया असहयोग, अझ धाये पंगः थनेगु ज्या । विशेषतः नेपाल पौडी संघ दुने च्वंपिंसं हे थ्व ज्या यायेगु याः । थः मस्त लिउने लाइ धकाः उमिसं फयांफत्तले गौरिकायात पनेत स्ययाच्वनी, वया परिवारयात दुःख बीत स्वयाच्वनी ।
उमिसं थुलितकं धायेगु याः, गौरिका ला विदेशी खः, नेपाःया म्ह्याय्मचा मखु । थ्व ला उमिगु आरोप न खः । थुकिया लिसलय् गौरिकां यानाक्यनेगु धयागु बांलाक म्हिता हे खः । वं थ्व पालय् थथे हे याःगु दु । सुनां अनुमान याये फुगु खः धकाः छन्हु सागया पौडीइ नेपाःया कासामिं स्वर्ण त्याकी धकाः ? थुकिया नितिं गौरिकायात सुभाय् बीमाः, बधाई नं बीमाः। आखिर गौरिका नेपाःया मुक्कं कासाख्यःया हे नम्बर १ कासामि जुइधुंकूगु दु ।