नेपाः ग्लोबल छनोटय् थाय् दयकेत असफल
एजेन्सी- मलेसियाय् जुयाच्वंगु आइसिसी मिसा टी–२० एसिया छनोटया सेमिफाइनलय् नेपाः पराजित जूगु दु । कासाय् पराजित जुइवं नेपाःया विश्वकप ग्लोबल क्वालिफायर म्हितेगु व धुंकाः मिसा विश्वकप म्हितेगु म्हगस नं क्वचाःगु दु । शुक्रवाः सुथय् जूगु सेमिफाइनल कासाय् नेपाःयात थाइल्याण्डं बुकूगु खः ।
सेमिफाइनल कासाय् थाइल्याण्डं नेपाःयात ४६ रनं बुकूगु खः । टस त्याका नेपालं न्हापां बलिङ याःगु खः । कासाय् थाइल्याण्डं निर्धारित २० ओभरय् निगू विकेटया क्षतिइ १०५ रन दयेकूगु खः । थाइल्याण्डया निंतिं दकलय् अप्व रन नान्नापत खोन्चरोएकाइं नटआउट ५९ रन दयेकल । नेपाःया कविता कुँवर व पुजा महतों छगूू छगू विकेट काःगु खः ।
थाइल्याण्डं बिउगु १०६ रनया लक्ष्य ज्वनाः मैदानय् वःगु नेपाःया टिमं बांलाःगु ब्याटिङ यायेमफुत । नेपाः मुक्कं ५९ रन जक दयेका १९.३ ओभरय् अलआउट जूगु खः । न्हापांगू न्यागू ओभरय् मुक्कं च्यागू रन दयेकूबलय् नेपाःया प्यंगू विकेट वनेधुंकूगु खः । नेपाःया शीर्ष प्यम्ह ब्याट्म्यान काजल श्रेष्ठ व कप्तान रुविना क्षेत्री शून्यय्, सीतारानामगर ४ रनय् व इन्दु वर्मा ३ रनय् आउट जूगु खः । व धुंकाः वःपिं कविता जोशी व अपसरी बेगमं १०÷१० रन दयेकाः आउट जूगु खः । नेपाःया निंतिं दकलय् अप्व कविता कुँवरं नटआउट १७ रन दयेकूगु खः ।
विन्दु रावल शून्यय्, पुजा महतो ४ व खुशी डंगोल १ रनय् आउट जूगु खः । थाइल्याण्डया नितिं ओनिचा कामचोम्फु व थिप्चा पुत्थावोंगं स्वंगू स्वंगू विकेट काःगु खः ।
शुक्रवाः जूगु मेगु सेमिफाइनल कासा त्याका युएइं नं फाइनल थाय् दयेकूगु दु । सेमिफाइनल कासाय् युएइं हङ्गकङ्गयात ५७ रनं बुकूगु खः । फाइनल कासा शनिवाः जुइ ।
LEAVE YOUR COMMENTS