फिफा विश्वकप-२०२६ : एट्लान्टाया सुरक्षा व्यवस्था कडा
एजेन्सी – फिफा विश्वकप फुटबल २०२६ अन्तर्गत थौं चान्हय् अर्जेन्टिना व इंग्ल्याण्ड दथुइ निगूगु सेमीफाइनल जू वनाच्वंगु दु । अर्जेन्टिना व इंग्ल्याण्डया थ्व कासा बहुप्रतिक्षित खः । थुपिं निगू देय्या दथुइ जुइगु बहुप्रतिक्षित निगूगु सेमीफाइनल कासायात ध्यानय् तयाः सुरक्षा व्यवस्था कडा याःगु दु ।
अर्जेन्टिना व इंग्ल्याण्डाया कासा एट्लान्टा स्टेडिमय् नेपाःया ईकथं थौं चान्हसिया १२ः४५ ताः इलय् जुइ । विश्व फुटबलया निगू पुलांगु प्रतिद्वन्दी टिम दथुइ जुइगु कासा स्वयां न्ह्यः ऐतिहासिक व राजनीतिक संवेदनशीलतायात ध्यानय् तयाः स्थानीय सुरक्षा प्रशासनं अतिरिक्त सुरक्षाकर्मी परिचालन यासें सुरक्षा व्यवस्था कडा याःगु खः ।
एट्लान्टा प्रहरीं कासा जुइगु स्टेडियम, मनोरञ्जन क्षेत्र, अप्वः हुलमुल जुइगु थाय्, पार्क, बार लगायतया थासय् थप सुरक्षा व्यवस्था लागू याःगु संचार माध्यमं न्ह्यथंगु दु । प्रहरीया कथं हरसम्भव उपाय अवलम्बन यानाः सम्भावित घटनापाखें फुटबलप्रेमी व स्वकुपिनिगु सुरक्षा सुनिश्चित यायेगु तयारी जुयाच्वंगु दु । सम्भावित अवाञ्छित गतिविधि पनेत व कासाज्वःछि सुरक्षाया कडा प्रबन्ध मिले यायेगु उद्देश्यं सुरक्षा व्यवस्था कडा यानागु राज्यया सुरक्षा अधिकारीतय्सं धाःगु दु ।
अर्जेन्टिना व इंग्ल्याण्डया प्रतिस्पर्धा धाये वा दुश्मनी फुटबलय् जक सीमित मजू । सन् १९४२ य् फकल्याण्ड युद्ध जूगु इलंनिसें निगू देय्या स्वापू उस्त बांलाः मजू । उगु इलय् अर्जेन्टिनाया माल्भिास दीप समूहयात कयाः फकल्याण्ड युद्धया नापं ७४ न्हु तक युद्ध जूगु खः ।
युद्धय् अर्जेन्टिनाया ६४९, इंग्ल्याण्डया २५५ सैनिकलिसें सर्वसाधारणया ज्यान वंगु खः ।
थुखे थौंया कासायात ध्यानय् तयाः कासा एट्लान्टाय् सुरक्षा व्यवस्था कडा यानातःगु दुसा उखे अर्जेन्टिनाया पूर्व सैनिकतय् महासंघं समर्थकतय्त फुटबलय् जक ध्यान केन्द्रीत यायेत व राजनीति मयायेत अपिल याःगु दु ।
जारी विश्वकप फुटबलय् अन्तिम १६ या कासाय् इजिप्टयात बुकेधुंकाः अर्जेन्टिनाया कासामिपिंसं माल्भिनास द्वीप समूह, लिजेन्ड कासामि डिएगो म्याराडोना व लियोनल मेस्सीया नां न्ह्यथनातःगु म्येँ हाःगु खःसा उगु म्येँया भिडियो सामाजिक संजालय् चर्चाय् वःगु खः ।
LEAVE YOUR COMMENTS