ने. सं. ११४४ कौलाथ्व चौथी -

आईसीसी विश्वकप क्रिकेट लिग–२, बन्द प्रशिक्षणया निंतिं १९ म्ह कासामि सःतल

येँ – नेपाल क्रिकेट संघं (क्यान) आईसीसी विश्वकप क्रिकेट लिग–२ अन्तर्गत नेपाल, अमेरिका व ओमानया दथुइ जुइत्यंगु त्रिकोणात्मक सिरिजया बन्द प्रशिक्षणया निंतिं १९ म्ह कासामितय्त बुधवाः सःतूगु दु । क्यानं बन्द प्रशिक्षण बिहिवाःनिसें जुइ धाःगु दु । नेपाः, अमेरिका व ओमानया दथुइ वइगु सेप्टेम्बरय् त्रिकोणात्मक सिरिज जुइत्यंगु दु ।

क्यानं बन्द प्रशिक्षणया निंतिं ज्ञानेन्द्र मल्ल, कुशल भुर्तेल, सन्दीप लामिछाने, सोमपाल कामी, करण केसी, आरिफ शेख, दिपेन्द्र सिंह ऐरी, आशिफ शेख, गुलशन झा, विनोद भण्डारी, कमलसिंह ऐरी, अविनाश बोहरा, शाहब आलम, सुशन भारी, शरद भेषवाकर, विक्रम शोब, पवन सर्राफ व रोहित कुमारयात सःतूगु खः । बलर गुलशन झायात न्हापांखुसी क्यानं बन्द प्रशिक्षणय् सःतूगु खः । क्यानं न्हापां २० म्ह कासामियात बन्द प्रशिक्षणय् सःतेगु धकाः पारस खड्कायागु नां नं दुथ्याकातःगु खःसां मंगलवाः खड्कां संन्यास घोषणा याःगुलिं १९ म्ह कासामियात जक सःतूगु खः ।

आईसीसी विश्वकप क्रिकेट लिग–२ य् नेपालं आःतक प्यंगू कासा जक म्हितूगु दु । लिगय् ४ अंकलिसें नेपाः खुगूगु थासय् दु । नेपालं लिगय् निगू कासा त्याकूगु दुसा निगू कासाय् बूगु दु । नेपालं अमेरिकाविरुद्ध म्हितूगु निगुलिं कासा त्याकूगु खःसा ओमानलिसे म्हितूगु निगूलिं कासाय् बूगु खः । नेपालं लिगय् ३२ गू कासा म्हिते मानि । कोरोना भाइरसया महामारीया कारणं लिग तःक्वः हे स्थगित जुइ धुंकल ।