तातोपानी नाका जेठं चायेकेगु तयारी

येँ – २०७२ सालया तःभुखाय् लिपा बन्द जुयाच्वंगु नेपाः–चीन स्वाइगु तातोपानी नाका वइगु जेठं सञ्चालनय् हयेगु तयारी जुयाच्वंगु दु । थुगु नाकायात सञ्चालनय् हयेगु ज्याय् निगुलिं देशं तीव्रता बिउगु दु । तातोपानी नाका सञ्चालनय् हयेगु निंतिं सतक दयेकेत सरकारं याकनं हे टेन्डर आह्वान यायेत्यंगु दु ।

टेन्डर लिपा याकनं हे उकिया निर्णय यायेगु खँ भौतिक तथा पूर्वाधार मन्त्रालयं धाःगु दु । सरकारं वइगु मे महिनाया दुने सतक चायेकेगु कथं सतक विभागयात निर्देशन बीधुंकूगु दु । मेखे सरकारं सतक दयेकेगु ज्या तीव्रता बीगु धाःसां नं आर्थिक अभाव जुयाः इलय् ज्या क्वचायेत थाकुइगु खँ धाःगु दु ।

सरकारं पुनर्निर्माणया निंतिं ३५ करोड तका फ्यानातःगु खःसां नं उलि ध्यबां पुनर्निर्माण थाकुइगु खँ सीदुगु दु । भुखाय् लिपा चीन सरकार थुगु नाका चायेकेत तयार मजुयाच्वंगु खःसा नेपाः सरकारया बारम्बार इनाप लिपा चीन आः वयाः उगु नाका चायेकेत तयार जूगु खः । भुखाय् ब्वये स्वयां न्ह्यः तातोपानी नाका नेपाः व चीनया मू व्यापारिक केन्द्र जुयाच्वंगु खःसां थौंकन्हय् धाःसा सुनसान जुयाच्वंगु दु ।

तातोपानी नाका चायेकेगु निंतिं चिनियाँ पक्ष थःगु भुभागय् निर्माण ज्या तीव्रता बियाच्वंगु दु । चीनं थःगु क्षेत्रय् निर्माण ज्यायात तीव्रता बीवं नेपालं नं सतक मर्मत यायेगु ज्यायात तीव्रता बीगु तयारी याःगु खः ।

तःभुखाय् व चलः वनाः नेपाः पाखे आपालं थासय् क्षति जूगु दुसा गुलिखे थासय् तां नं दयेकेमाःगु अवस्था दुगु खँ सतक विभागं धाःगु दु । तातोपानी नाका बन्द जुइवं व्यापारीतय्सं केरुङ नाका व भारतीय सिमाना जुयाः सामान आयात याना वयाच्वंगु खः ।भुखाय् लिपा चीन सरकार थुगु नाका चायेकेत तयार मजुयाच्वंगु खःसा नेपाः सरकारया बारम्बार इनाप लिपा चीन आः वयाः उगु नाका चायेकेत तयार जूगु खः ।