‘इलय् ज्या क्वचायेकूपिं निर्माण व्यवसायीतय्त प्राथमिकता बीगु जुइ’

येँ – प्रधानमन्त्री केपी ओलीं क्वःछिनातःगु इलय् हे विकास निर्माणया ज्या क्वचायेकेत निर्माण व्यवसायीतय्त निर्देशन बियादीगु दु । नेपाल निर्माण व्यवसायी संगठनया शनिवाः जूगु एकता घोषणा समारोहय् न्ववासें प्रधानमन्त्री ओलीं क्वःछिनातःगु इलय् ज्या क्वमचायेगु प्रवृत्तिं देय्या हीत यायेफइमखु धासें थुकी आर्थिक समृद्धिय् लँय् नं पंगः थनीगु खँ धयादिल ।

प्रधानमन्त्री ओलीं इलय् हे ज्या क्वचायेकीपिं निर्माण व्यवसायीयात ठेक्क बीबलय् सरकारं न्हापांगु प्राथमिकताय् तयेगु घोषणा नं यानादिल । वय्कलं देय्यात समृद्ध दयेकेगु जिम्मा निर्माण व्यवसायीतय् ब्वहलय् नं दुगु खँ न्ह्यथँसें थुकियात पूवंकेत प्रतिबद्ध जुयाः ज्या यायेत इनाप यानादिल ।

थ्व झ्वलय् वय्कलं निर्माण व्यवसायीतय् समस्या ज्यंकेत सरकार प्रतिबद्धता दुगु खँ न्ह्यथँसें देय्या आर्थिक समृद्धिया निंतिं माःगु फुक्कं शक्ति परिचालन यायेगु खँ धयादिल । अथेहे नेकपाया अध्यक्ष पुष्पकमल दाहालं निर्माण व्यवसायय् खनेदुगु कमजोरी चिइकाः गुणस्तरीय ज्या यायेगु वातावरण दयेकेत इनाप यानादिल ।

वय्कलं सरकारपाखें कर्मचारी प्रशासनय् दुगु कमजोरी, ऐन कानूनं लानाच्वंगु प्रभाव लगायत समस्या ज्यंकेत सरकारं सकारात्मक पहल याइगु खँ नं धयादिल ।थ्व झ्वलय् वय्कलं छुं तःधंपिं व्यवसायीतय्गु एकाधिकार त्वाःथलाः समानरुपं ज्या यायेगु अवसर बीगु व इलय् हे ज्या क्वचायेकीपिं व्यवसायीतय्त विशेष सुविधा बीगु कुतः यायेगु खँ नं धयादीगु खः ।

तत्कालिन एमालेया सतिक लाःगु नेपाल निर्माण उद्योग परिषद् व तत्कालिन माओवादी समर्थित नेपाल राष्ट्रिय निर्माण व्यवसायी महासंघया दथुइ एकता जुयाः नेपाल निर्माण व्यवसायी संगठन नीस्वंगु खः ।