गृहमन्त्रीया लिसः – जनमत संग्रह मखु

येँ – गृहमन्त्री रामबहादुर थापां डा. सीके राउतलिसे जूगु ११ बुँदे सम्झौताय् न्ह्यथनातःगु ‘जनअभिमत’ शब्दयात ‘जनमत संग्रह’या रुपय् थुइके मजिउगु खँ कनादीगु दु । वय्कलं धयादीगु दु, ‘ ‘जनमत संग्रह’ व ‘जनअभिमत’ बिस्कं शब्द खः ।’ सीके राउतं सरकारलिसे स्वतन्त्र मधेशया निंतिं जनमत संग्रह यायेगु सहमति जुल धकाः प्रचार यानाच्वंगु दुनि धकाः सांसदतय्सं न्यंगु न्ह्यसःया लिसः बिसें गृहमन्त्री थापां धयादी, ‘जनअभिमत व जनमत संग्रह बिस्कं शब्द खः ।

यदि सीके राउतं अज्याःगु प्रचार यानाच्वंगु दुसा व सहमति अःखः खः, अथे जुल धाःसा स्थिति हाकनं पुलांगु हे अवस्थाय् लिहां वनी ।’
लिसें वय्कलं सरकारं सीके राउत समक्ष आत्मसमर्पण याःगु मखु धासें नत सीके राउतं हे सरकारया न्ह्यःने आत्मसमर्पण याःगु खः धकाः स्पष्ट नं यानादीगु दु ।

सीके राउतं थःगु फेसबुक वालय् स्वतन्त्र मधेशया निंतिं जनमत संग्रह यायेत सरकारं प्रतिवद्धता प्वंकूगु प्रचार यानाच्वंगु दु । वय्कलं सीके राउत प्रति नरम व नेकपा विप्लव प्रति कडा रवैया क्यंगु आरोपयात नं अस्वीकार यानादीगु दु । वय्कलं छगू पुचः हिंसां सत्ता हिले फइ धकाः वनाच्वंगु दु गुगु संविधान व विकास विरोधी ज्या खः धासें राजनीतिक समस्यायात राजनीतिक रुपं समाधान यायेत सरकारं तयार दुगु खँ स्पष्ट यानादिल ।