सत्ता गठबन्धनय् नं खटपट शुरु

येँ -प्रधानमन्त्री शेरबहादुर देउवां मन्त्रिमण्डल विस्तार मयाःगु कारणं सत्तारुढ गठबन्धन दुने कचवं पिहां वइगु अवस्था ब्वलंगु दु । प्रम देउवां म्हीग हे मन्त्रिमण्डल विस्तार यायेगु धकाः तयारी यानादीगु खःसां अझ नं आलटाल यानाच्वंगुलिं गठ–बन्धनया मेगु घटकत तंचाःगु दु ।

म्हिगः च्वंगु गठबन्धनया बैठकय् माओवादी केन्द्रया अध्यक्ष पुष्पकमल दाहालं आः छन्हु निन्हु नं मन्त्रिमण्डल विस्तार याये मफुत धाःसा थःपिनि दथुइ हे संकट वःगु ख्याच्वः बियादीगु दु । वय्कलं छन्हु निन्हुं नं मन्त्रिमण्डल विस्तार मजूसा थौंकन्हय् सरकारय् छ्वया तयापिं थःपिनि निम्ह मन्त्री नं लित सःतेगु जुइ धकाः ख्याच्वः बियादीगु खँ सीदुगु दु । दाहालं मन्त्रीत लित सःतूसां सरकारयात बियातयागु समर्थन धाःसा जारी हे जुइगु खँ नं धयादीगु दु ।

सूत्रया कथं सरकार विस्तार यायेत थाकुयाच्वंगुया मू कारण दल विभाजन सम्बन्धी अध्यादेश लित कायेगु बारे पिहां वयाच्वंगु विवाद खः । जसपां थ्व अध्यादेश याकनं लित काये माल धकाः सरकारयात इनाप यानाच्वंगु दुसा नेकपा (एस) पाखें धाःसा अध्यादेश लित काये मजिउ धकाः पनातःगु दु । अध्यादेश लित काल धाःसा थःगु पार्टीया वैधानिकताय् न्ह्यसः पिहां वये फइगु जूगुलिं नेकपा–एसं अध्यादेश कायम यानातःगु दु ।

जसपाय् धाःसा अध्यादेशं यानाः थःपिनि पार्टी हानं तज्याइगु खः लाकि धकाः उकिया नेतात ग्यानाच्वंगु दु । गठबन्धन दुने खँ मिले जुयाः म्हिगः च्वंगु बैठकय् जसपा अध्यक्ष उपेन्द्र याद उपस्थित नं जुया मदी । वय्कःया पलेसा डा. बाबुराम भट्टराई बैठकय् सहभागी जुयादीगु खः । थ्व विवाद प्रमं हे ज्यंकि धकाः नं दबाब वनाच्वंगु दु ।

ज्योतिषं धाःगुलिं आलटाल ?
प्रधानमन्त्री शेरबहादुर देउवां मन्त्रिमण्डल विस्तारया ज्यायात न्हिंन्हिं लिछ्यानाच्वंगुया कारणं गठबन्धन दुने खँ मिले मजुयाः जक मखु धाःगु दु । वय्कःयात पश्चिमपाखेया छम्ह ज्योतिषं आः तुरुन्त मन्त्रिमण्डल विस्तार याये मतेनि धाःगु कारणं वय्कलं आलटाल यानाच्वंगु खँ सीदुगु दु । सूत्रं बिउगु जानकारी कथं उम्ह ज्योतिषं देउवायात थ्व असोज लछि नं थथे हे आलटाल यानाः टारे याना छ्व धकाः ‘सुझाव’ बिउगु कारणं देउवां मन्त्रिमण्डल विस्तार मयाःगु खः । असोज महिना लिपा स्थिति बांलाना वइगु जूगुलिं अबलय् तक मन्त्रिमण्डल विस्तार या धाःगु खँ थौंकन्हय् कांग्रेस वृत्त दुने चर्चाया विषय जुयाच्वंगु दु । न्ह्यागु ज्या नं ज्योतिषं धाः कथं जक याइम्ह प्रम देउवां ल्हातय् न्ह्यानातःगु तःपाःमछि अंगू नं इलय् ब्यलय् चर्चाया विषय जुइगु याः ।