हि खपत अस्पतालय् तथ्यांक मदु

सरकारी व निजी ख्यःया अस्पतालं दँय्दसं गुलि पिन्ट हि खपत यायेगु यानाच्वंगु दु धइगु बारे छुं यकिन तथ्यांक छुं नं निकायय् मदु । अस्पतालं वार्षिक रुपय् खपत याइगु हिया तथ्यां तयाः स्वास्थ्य तथा जनसंख्या मन्त्रालय व केन्द्रीय जनस्वास्थ्य प्रयोगशालाय् अनिवार्य जानकारी (रिपोर्टिंग) यायेमाःगु प्रावधान दुगु खःसां नं आतक नं छुं नं अस्पतालं उकथं थःपिंसं याना वयाच्वंगु हिया खपत बारे रिपोर्टिंग यायेगु यानाच्वंगु मदु ।

उकिसनं हिया गुलि प्रकारया तत्व छ्यलाबुलाय् वइगु खः व हिया तत्व ल्वगिया म्हय् मिले मजूगु कारणं ग्वःम्ह अकालय् सिनाच्वन धइगु नं छुं तथ्यांक मदुगु जक मखु जानकारीतक नं मदु । दकलय् अप्वः चिकित्सा विज्ञान अध्ययन प्रतिष्ठान (न्याम्स) अन्तर्गतया वीर अस्पतालय् हिया खपत जुइगु यानाच्वंगु धाःगु दु ।

जँलास्येँया प्रत्यारोपण, क्यान्स, प्वाथय् दुपिं, दुर्घटना लगायतया घटनाय् लाःपिनिगु निंतिं हिया माग अप्वः जुइगु यानाच्वंगु दु । सरकारी व निजी ख्यःया ततःधंगु अस्पतालं थःपिंसं हे रक्तसंचार सेवा संचालन याना वयाच्वंगु दु । मेखे हिया ‘एन्टिबडी टेष्ट’ नेपालय् शुरु जुइ फयाच्वंगु मदुनि ।

थ्व हे झ्वलय् केन्द्रीय जनस्वास्थ्य प्रयोगशालां हिया सुपरीवेक्षण प्रतिवेदन (हेमोभिलिजेन्स)–२०१८ सार्वजनिक याःगु दु । सुरक्षित हिया संकलन, भण्डारण, परीक्षण हियातत्वया निर्माण यायेगुनिसें कयाः ल्वगिं प्राप्त याइगु अवस्थायात हे ‘हेमोभिलिजेन्स’ धाइगु खः ।
निगू सरकारी अस्पताल प्रसूती गृह व मिसा ल्वय्, शहीद गंगालाल हृदयरोग व निगू निजी ख्यःया अस्पताल ओम व नेशनल क्यान्स अस्पतालयात उगु प्रतिवेदनया निंतिं छनोट याःगु खः ।

तर, शहीद गंगालाल हृदयरोग व ओम अस्पतालं प्रतिवेदनया निंतिं आवश्यक तथ्यांक उपलब्ध मयाकूगु प्रयोगशालां न्ह्यथंगु दु ।
प्रयोगशालाया निर्देशक प्रा. डा. हरिशचन्द्र उप्रेतीं प्रतिवेदन सार्वजनिक यासें हि धइगु मानव जीवन म्वाकीगु वासः जूगुलिं थुकिया सुरक्षा विशेष ध्यान बीत इनाप यासें हियात गुकथं सुरक्षित याकेगु धइगु विषयय् प्रयोगशालां विश्व स्वास्थ्य संगठनया मापदण्डकथंया हे मापदण्ड दयेकागु धयादिल ।

रक्तसंचार सेवायात अझ गुणस्तर दयेकेगु ध्येयं अध्ययन प्रतिवेदनया ज्या शुरु जूगु जानकारी बियादिसें वय्कलं वइगु दिनय् सरकारी व निजी ख्यःया अस्पतालय् दुगु रक्त सेवायात हेमोभिजिलेन्स ज्याझ्वलय् आवद्ध जुइत इनाप यानादिल । प्रयोगशालाया विज्ञ डा. रेखा मानन्धरं प्रतिवेदनय् रिपोर्टिंग जूगु निगू अस्पतालपाखें द्वःछि व झिंनिगू हिया नमूना वःगु जानकारी बियादिल । प्रयोगशालाया पूर्व निर्देशक डा. गीता शाक्यं द क्वं अस्पतालयात हेमोभिजिलेनस ज्याझ्वलय् आवद्ध जुइत इनाप यानादिल ।