ने. सं. ११४४ ञलाथ्व नवमी -

क्यानाडाय् न्हूदँ, म्हपुजालिसें थीथी ज्याझ्वः

येँ(नेपालभाषा टाइम्स)- क्यानेडियन नेवाः गुथिं नं नेपाल संवत् ११४३ न्हूदँ या लसताय् भिंतुना कालबिल, मंकाः म्हपुजालिसें थीथी ज्याझ्वः याःगु दु । गुथिपाखें न्हूदँया लसताय् सुथय् भिंतुना कालबिललिसें सनिलय् मंकाः म्हपुजानापं थीथी ज्याझ्वः याःगु खः । क्यानाडाया मिसिसागा नगरया प्रित प्यालेस पे्रक्षालयय् म्हपुजालिसें थीथी ज्याझ्वः याःगु खः ।

ज्याझ्वलय् मूपाहांकथं झायादीम्ह ब्राम्प्टन नगर वडा ३ व ४ या रिजनल काउन्सिलर मार्टिन मेरिडिसं बहुसांस्कृतिक नगर ब्राम्प्टनया सांस्कृतिक विविधतायात अझ अप्वः च्वन्ह्याकेत बैभवपूर्ण यायेत गुथिं याना वयाच्वंगु ज्याझ्वः व गतिविधियात कयाः च्वछायादिल । लिसें नेपाल संवत् ११४३ न्हूदँया लसताय् भिंतुना देछासे वय्कलं ल्याय्म्हपुस्ताया इच्छाकथं संस्कृतिलिसें मेमेगु ज्याझ्वःया निंतिं नं ग्वाहालि यायेत थः न्ह्याबलें तयार दु धयादिल ।

ज्याझ्वलय् लसकुस यानादिसें गुथिया मूछ्याञ्जे विमल श्रेष्ठं कोरोना भाइरस संक्रमणया कारणं वंगु निदँ थुखे मंकाःकथं याये मखनाच्वंगु म्हपुजा थुगुसी हाकनं सकसिगुं उपस्थितिइ न्ह्यइपुक याये खंगु धासें लसता प्वंकादिल ।

न्वकु उत्तम माकजुं म्हपुजाया महत्व बारे कुलादिसें दक्वं दर्शनय् आत्मयात सम्मान यायेगु मान्यता दुगु तर नेवाः समुदायं दँय्दसं निश्चित दिनय् विधिपूवर्क पुजा यानाः आत्मयात शुद्ध यायेगु व म्हसीकेगु ल्याखं म्हपुजा याना वयाच्वंगु खः धासें थ्व धाथें नं नेवाःया मौलिक परम्परा जूगु खँ कनादिल । छ्याञ्जे सुमन राजवंशीं ज्याझ्वः ताःलाकेत व गुथिया ज्याझ्वलय् उत्साहपूर्वक ब्वति कायेत झायादीपिं सकल पाहांपिंत सुभाय् देछानादीगु खः ।

मंकाः म्हपुजाय् मूछ्याञ्जे श्रेष्ठं पुजा विधियात कयाः सहजीकरण यानादीगु खःसा लिउ दांभरिं चन्दा श्रेष्ठ, मिसा दुजःपिं शान्ति कर्माचार्य माकःजु, डा. सबिना श्रेष्ठ, शान्ति कर्माचार्य माकःजु, डा. सबिना श्रेष्ठ, मौसमी ताम्राकार, सबिना शाक्य, नन्दादेवी महर्जन, अरुणा प्रधान, सुजिता मल्ल, प्रतिमा प्रधान, रामेश्वरी पक्वान, डा. माधुरी भण्डारीं म्हपुजाया विधि न्ह्याकादीगु खः । उगु इलय् गुथिया ज्याःजक्वं क्वचायेधुंकूपिं ज्याथःपिं मिसा दुजःपिं नेपाल सरकारया वनस्पति विभागया पुलांम्ह महानिर्देशक डा. तारकेश्वरी राजभण्डारी, नेवाः संस्कृतिया ज्ञाता अष्टकुमारी ताम्राकारयात हनेज्या नं याःगु खः ।

म्हपुजा लिपा जूगु सांस्कृतिक ज्याझ्वलय् मिसा पुचः संयोजक रञ्जना सैंजूं सितार, नांजाःम्ह वाद्यवादक सानुराजा महर्जनं मादल, डा. अमर सैंजू, रबिन प्रधान, डा. कृष्ण भण्डारी र उत्तम माकःजुया पुचलं बुद्ध वन्दनालिसें थीथी नेवाः म्येँय् सांस्कृतिक धुन न्ह्यब्वयादीगु खःसा दांभरिं राजेन्द्र महर्जन व सिचु अवालें प्याखं न्ह्यब्वयादीगु खः ।