लुँवह व्यवसाययात कयाः सचेतना अन्तक्र्रिया
येँ – नेपाल सुनचाँदी व्यवसायी महासंघया ग्वसालय् लुँवहया व्यवसायय् खने दुगु समस्या व उकिया समाधानया लँपुयात कयाः छगू सचेतना ज्याझ्वः जुल । ‘लुँवह पेशा संचालनसम्बन्धी सचेतना ज्याझ्वःया नामं जूगु सचेतना व अन्तक्र्रिया ज्याझ्वलय् सरकारी निकायया प्रतिनिधि व सम्बन्धित व्यवसायीतय्सं लुँवहया व्यवसायय् खने दुगु समस्या व उकिया निराकरणयात कयाः चर्चा यानादीगु खः ।
ज्याझ्वःया मूपाहां नेपाल गुणस्तर तथा नापतौल विभागया महानिर्देशक विश्वबाबु पुडासैनीं छुं नं व्यवसाय याये न्ह्यः व सम्बन्धी कानूनी पक्षया जानकारी दयेमाःगु अतिकं आवश्यक जू धयादिल । कानूनी पक्षयात ध्यान मतइगुलिं हे व्यवसायीत इलय्व्यलय् समस्या लानाच्वनीगु खँ न्ह्यथँसें वय्कलं कानून स्वयां च्वय् सुं नं मदइगु जूगुलिं कानूनं क्वःछिनातःगु सीमा दुने च्वनाः थःथःगु पेशा व्यवसाय संचालन यायेत वय्कलं सकसितं इनाप यानादिल ।
लुँवहया व्यवसाय संचालन यायेबलय् तौल, गुणस्तर, जल्ति, ज्याला थेंज्याःगु विषययात गम्भिरतापूर्वक कायेत सम्बन्धित व्यवसायीतय्त इनाप यासें लिसें वय्कलं लुँवहया कारोबार यायेबलय् फत्तले ग्राम वा किलोग्रामय् जक यायेत इनाप यानादिल । लिसें वय्कलं थथे जुल धाःसा मेमेगु विधि नं नाला वने फइगु सुझाव बियादिल ।
ज्याझ्वलय् विभागया हे पुलांम्ह महानिर्देशक डा. सिताराम जोशीं ज्यापौ न्ह्यब्वयादिसें गुणस्तर व कारोबार सम्बन्धी मापदण्ड दयेकेगु जक तःधंगु खँ मखु धासें उकिया प्रभावकारी कार्यान्वयन दकलय् महत्वपूर्ण पक्ष जुइ धयादिल । महासंघया अध्यक्ष मोहनकुमार सुनारं कानूनी रुपं खने दयाच्वंगु पंगलया कारणं थुगु व्यवसाय् समस्याय् लानाच्वंगु धासें उकथंया पंगल चिइकेत सरकारी निकाययात इनाप यानादिल ।
लुँवहया कारोबारसम्बन्धी निर्देशिका मस्यौदा दयेकूगु ताःई दयेधुंकाः नं आतकं उकियात मूर्त रुपं बी मफुगु, माग कथं कच्चा पदार्थ उपलब्ध मजूगु, आवश्यकता कथं कुचा लुँ काये मखंगु, अनेक त्वह तयाः व्यवसायीतय्त अनावश्यक रुपं झन्झट बीगु यानाच्वंगु खँय् अध्यक्ष सुनारं असन्तुष्टि प्वंकादिल ।
अथे हे महासंघया वरिष्ठ उपाध्यक्ष माणिकरत्न शाक्यं लुँवहया गुणस्तरयात प्रभावकारी दयेकेत हल मार्किंगया आवश्यकता दुगु खँ कुलादिसें न्हूगु वःगु उपभोक्ता संरक्षण ऐन न्हापां स्वयां तसकं कडा जूगुलिं थुकिं व्यवसायीतय्त समस्या जुइ फुगु खँय् सचेत यानादिल ।
ज्याझ्वलय् राष्ट्रिय उपभोक्त मंचया अध्यक्ष प्रेमलाल महर्जन, आयोजक समितिया संयोजक लिसें महासंघया उपाध्यक्ष विपिन रामुदामु, महासंघया सचिव धर्मसुुन्दर वज्राचार्य, निवर्तमान अध्यक्ष मणिरत्न शाक्य, उपाध्यक्षपिं दियसरत्न शाक्य, मोहनकाजी शाक्य शिव सर्राफ, कोषाध्यक्ष महेन्द्ररत्न शाक्य, सचिव किरणभाई वज्राचार्यलिसें महासंघय् आवद्ध जिल्ला व नगरया प्रतिनिधिपिंसं थःगु व्यवसाय व थःपितं जुयाच्वंगु समस्ययात कयाः नवानादीगु खः ।
LEAVE YOUR COMMENTS