अप्वया वनाच्वंगु सार्वजनिक अपराध
देशय् मेमेगु अपराधया तुलनाय् सार्वजनिक अपराधया घटना गाक्कं अप्वः जू । अपराधया न्हापांगु तहकथं काइगु थज्याःगु कसुरया प्रकृति यक्वं जुइगु जूगुलिं न्ह्यागु थासय् नं घटना जुइफु । थज्याःगु अपराधया बेवास्ता यानाः पनेगुपाखे लगले मजुल धाःसा थुकिं गम्भिर प्रकृतिया घटना ब्वलनीगु खतरा दइगु सुरक्षा अधिकारीया धापू दु ।
नेपालय् प्रहरीया तथ्यांककथं नं सार्वजनिक अपराधया घटना अप्वः खने दुगु धइगु गम्भिर प्रकृतिया अपराध अप्वयेकीगु संकेत खः । सार्वजनिक शान्ति सुरक्षाय् लिच्वः लाकेगु हे सार्वजनिक अपराध जूगु न्ह्यथँसें महानगरीय प्रहरी परिसर येँया प्रहरी नायब उपरीक्षक होविन्द्र बोगटीं न्हापांगु तहया अपराध जुइगु जूगुलिं थुकी वयात भिंकेगु निंतिं बीगु सजायया रुपय् मुद्दा न्ह्याः वनीगु धयादिल ।
वंगु दँय् थीथी अपराधय् २५ द्वः ५०९ गू मुद्दा दर्ता जूगुलिइ सार्वजनिक अपराधया जक ९,६५७ गू मुद्दा दु । वि.सं. २०७४ य् २५,७५५ मध्ये सार्वजनिक अपराधया १२ द्वः स्वयां अप्वः मुद्दा दर्ता जूगु खः । कसुरया प्रकृति आपालं दुगुलिं सार्वजनिक अपराधया मुद्दा नं आपालं खने दुगु प्रहरी प्रवक्ता लिसें प्रहरी वरिष्ठ उपरीक्षक उत्तमराज सुवेदीं कनादिल ।
अज्याःगु घटनायात सुनानं बेवास्ता मयासे प्रहरीयात खबर यायेमाःगु वय्कःया धापू दु । सार्वजनिक हित अःखःया घटना सार्वजनिक घटना दुने लाः । ‘लाक्वपाक्व धंगं ब्वःबीगु निसें हायेकूगु, अभद्र व्यवहार याःगु, मापसे यानाः समाजय् होहल्ला यायेगुनिसें टोले गुण्डा, जःलाखःलाया ल्वापु, सामाजिक विकृति, हातपात दक्वं सार्वजनिक अपराध दुने लाः’ प्रवक्ता सुवेदीं कनादिल ।
वि.सं. २०७४ य् स्वयां २०७५ य् अपराधया घटनाय् छुं म्हो खने दुसां नं दकलय् अप्वः धाःसा सार्वजनिक अपराधयासम्बन्धी मुद्दा हे दु । प्रहरीयाकथं वि.सं. २०७५य् आत्महत्यासम्बन्धी ५,३३७, लागू वासःसम्बन्धी ३,०२४, जबरजस्ती करणीइ १,७६०, बैकिंग कसुरसम्बन्धी १,७७३ गू मुद्दा दर्ता जूगु दु ।
मेमेगु घटनाया तुलनाय् कर्तव्य ज्यान, ज्यान कायेगु उद्योग, जबरजस्ती करणी उद्योग व मानव बेचविखनया घटनाय् म्होति दुगु सुवेदीं जानकारी बियादिल । सार्वजनिक अपराधया घटनाय् वि.सं. २०७५ य् ३३ द्वः स्वयां अप्वःयात ज्वनाः कारवाही न्ह्याकूगु दु ।
व स्वयां न्ह्यःया दँय् स्वीगुद्वःयात ज्वनाः कारवाही यानागु प्रहरीं न्ह्यथंगु दु ।
थुगु दँ अपराध नियन्त्रण अभियानसहितया समुदाय–प्रहरी साझेदारी ज्याझ्वः संचालनया कारणं आपराधिक घटनाय् म्होति वःगु नेपाल प्रहरीया दावी दु । प्रहरी महानिरीक्षक सर्वेन्द्र खनालं अपराध नियन्त्रण अभियान व समुदायया ग्वाहालिया कारणं संगठित अपराध दिउगुलिं समग्रय् शान्ति सुरक्षा सबल खने दुगु धयादीगु दु ।
देशय् बन्द, हडतालया घटना तकं मजूगु व आम नागरिकं शान्तिया महसुस याइगु वातावरण निर्माण जुजुं वंगु धासें वय्कलं थुकियात कायम यायेत समुदायलिसें सहकार्य यायेगु लक्ष्यसहित समुदाय प्रहरी साझेदारी ज्याझ्वः लागू यानागु धयादिल । प्रहरीं २०७५य् २६७ अवैध ल्वाभः व ६३७ गोली बरामद याःगु व ३५१ म्हयात ज्वनाः कारवाही यानागु जानकारी बिउगु दु ।
अपराध नियन्त्रण यानाः शान्ति सुरक्षा व अमनचयन कायम यायेत न्हूगु फौजदारी अपराधसंहिताया विषयय् झण्डै प्यद्वःम्ह प्रहरी कर्मचारीयात प्रशिक्षण बियाः प्रशिक्षक तयार यानाः अपराध अनुसन्धानय् लगे जूपिं प्रहरीयात तालिम बीगु क्रम जारी दुगु प्रहरीं न्ह्यथंगु दु ।
LEAVE YOUR COMMENTS