म्हसीका मालेगु झ्वलय् विमोचन

ख्वप – नेपालभाषा आन्दोलनया न्ह्यलुवानापं सिद्धिदास प्रतिष्ठान ख्वपया नायः नरेन्द्रभक्त हाडाया न्हापांगु कृति ‘म्हसीका मालेगु झ्वलय्…’ वाङ्मय शताब्दीपुरुष सत्यमोहन जोशीं विमोचन यानादिल । ज्याझ्वलय् नवासें मूपाहां जोशीं छुं नं जाति, इमिगु भाषा व संस्कृति ल्यंकातयेगु खःसा दकलय् न्हापां थःपिंसं थःथःगु मांभाय् ल्हाना वनेमाःगु खँय् बः बियादिसें नेवाःत थःगु भाय् त्वःता वनेत बाध्य जूगुया लिउने राज्यया शिक्षा नीतिया नं तःधंगु हे ल्हाः दु धयादिल ।

नेवाः न्ह्यलुवा मल्ल के. सुन्दरं मानव सभ्यताया विकासया लागिं वैज्ञानिक रुपं हे जात जातियात विशेषाधिकार व्यवस्था यायेमाःगु प्रमाणित जुइधुंकूगु व उकिसनं संयुक्त राष्ट्र संघं हे थीथी देय्या निंतिं उकथंया विशेषाधिकार जारी याये धुंकूगु अवस्थाय् झी नेवाःतय्सं नं उकियात सदुपयोग यायेत स्वयेमाःगु खँ कनादिल ।

शिक्षक त्रिरत्न शाक्यं सफूया समीक्षा यानादिसें च्वसुया स्तरीयतां हे जक च्वमियात मापन याइ धासें भाषा, शिक्षा व कम्युनिष्ट आन्दोलन लागाय् नरेन्द्रभक्त हाडां यानादीगु योगदानयात कया ध्वाथुइकादिल ।

प्रतिष्ठानया नायः व सफूया च्वमि हाडाया सभापतित्वय् जूगु उगु ज्याझ्वलय् नेवाः देय् दबूया नायः नरेश ताम्रकार, वल्र्ड नेवाः अर्गनाइजेशन नेपाल च्याप्टरया नायः शाक्य सुरेन, नेपाल साहित्य मन्दिरया नायः तिलकप्रकाश कायस्थ, सम्पादकमण्डलपाखें शिक्षक महेन्द्रगोपाल कर्माचार्य व प्रतिष्ठानया छ्याञ्जे अमररत्न वज्राचार्यपिंसं नं नवानादीगु खः । उगु सफुतिइ नेपालभाषाया झिंन्हय्पू व खस् भासं च्वयातःगु खुपू च्वसुलिसें अन्तर्वार्ता नं दुथ्याकातःगु दु ।

 

 

सम्बन्धित बुखँ

LEAVE YOUR COMMENTS