किपुलिइ महिला क्षमता अभिवृद्धि व लेखा व्यवस्थापन तालिम क्वचाल

किपू – किपू नगरपालिका वडा नं. ३या ग्वसालय् न्ह्यानाच्वंगु महिला क्षमता अभिवृद्धि व लेखा व्यवस्थापन तालिम क्वचाःगु दु । वडाया ग्वसालय् निगू पुचलय् ब्वथलाः न्यान्हु न्यान्हुया उगु तालिम जूगु खः । ३ वडाया ग्वसालय् महिला क्षमता अभिवृद्धि व बचत समहूया लेखा व्यवस्थापन सम्बन्धी तालिम वंगु असार २७ गते शुरु जूगु खः ।

समापन ज्याझ्वलय् मूपाहांकथं झायादीम्ह किपू नगरपालिकाया प्रमुख रमेश महर्जनं तालिम कयादीपिं प्रशिक्षार्थीतय्त दसिपौ लःल्हानादीगु खः । ज्याझ्वलय् नवासें नगर प्रमुख महर्जनं तालिमया निंतिं तालिम जक काःगु मखसे तालिम कयादीपिं सकसिनं थःपिनिगु क्षमता अभिवृद्धि यायेगु ज्या नं अवश्य याःगु दयेमाः धइगु थम्हं विश्वास कयागु दु धयादिल ।

थःपिं नगरपालिकाय् जनप्रतिनिधिया रुपय् निर्वाचित जुया वयागु न्यय्ला पूवंगु खँ कनादिसें उगु इलय् थःपिं निर्वाचित जुया वयेवं ‘जिगु किपू समृद्ध किपू’या नारा बियागु व आः वयाः उगु नारा पूवनाच्वंगु दु धयादिल ।

अबलय् किपुलिइ लः वल धाःसा किपू देय् समृद्ध जुइ धइगु सकसिनं तायेकाच्वंगु खँ न्ह्यथनादिसें वय्कलं आः किपुलिइ लःया समस्या नं लगभग ज्यनेधुंकूगु व आः रोजगार अप्वयेकेमाःगु व उकिया निंतिं क्षमता अभिवृद्धि यायेमाःगु आवश्यकतायात वाः चायेकाः वडापाखें थुकथंया तालिमया ग्वसाः ग्वःगु लसता खँ खँ धयादिल ।

किपू ३ वडाय् जक सक्रिय थ्यंमथ्यं नीगुलिं मल्याक मिसा पुचः सक्रिय जुयाच्वंगु दुसा थुपिं मिसा पुचलं ध्यबा मुंकेगु ज्या नं याना वयाच्वंगु दु । मुंका तःगु ध्यबाया पाय्छिकथं ल्याःचाः तयेमाःगु आवश्यकता महसुस यानाः वडापाखें उगु तालिम ग्वसाः ग्वःगु खः ।

तालिमय् सक्रिय मिसा पुचःया करिब पीन्याम्हेसिनं ब्वति काःगु खःसा सुभाष शर्मा, नानी महर्जनपिंसं प्रशिक्षण बियादीगु खः । तालिम समापन ज्याझ्वलय् उपप्रमुख सरस्वती खड्का, प्रशिक्षक शर्मा, २ वडाअध्यक्ष रमेशमान डंगोल, प्रशिक्षार्थीपिं राजेश्वरी माली, दीक्षा महर्जन, मृदुला श्रेष्ठं तालिमया थीथी पक्षयात कयाः थःथःगु विचाः तयादीगु खः ।

सम्बन्धित बुखँ

LEAVE YOUR COMMENTS