सुकुम्बासी वस्तीइ नं छेँ न्याये–मी
येँ-येँया थीथी थासय् अनधिकृत रूपं कायम जुयाच्वंगु सुकुम्बासी बस्ती दुने नं छँ न्या–मीगु ज्या जुयाच्वंगु खँ सीदुगु दु। देय्या गुगुं नं थासय् थःपिनिगु नामय् भूमि मदु धकाः येँया थीथी खुसि सिथय् च्वनाच्वंपिं सुकुम्बासीतय्सं थौंकन्हय् बस्ती दुने थः च्वंच्वनागु छेँ न्याये–मी समेत याना हःगु खः ।
सुकुम्बासी वस्तीइ थौंकन्हय् निकू क्वथा दुगु छतँजाःगु छेँया खुगू लाखं निसें च्यागू लाख तकां तक न्याये–मी जुयाच्वंगु खँ छम्ह नां कने चाहे मजूम्ह सुकुम्बासीं ‘नेपालभाषा टाइम्स’ यात कंगु दु ।
थ्व स्वयां अप्वः एरिया दुने छँे झिंन्यागू लाखं तक न्याये–मीगु ज्या जुइगु खँ नं उम्ह मनुखं कंगु दु ।
थौंकन्हय् त्रिपुरेश्वर लिउने बागमति खुसि सिथय् च्वंगु लागाय् थुकथं छेँ न्याये–मी ज्या जुयाच्वंगु दु । अन छेँ न्याये–मीगु लागिं छुं वैधानिक आधार मदुसां सुकुम्बासी जुयाच्वंपिंसं हे घरायसी भ्वं दयेकाः भोगचलन अधिकार हस्तान्तरण याना थकीगु खँ सीदुगु दु । सरकारं थःपिंत थनीगु सम्भावना मदुगुलिं अज्याःगु छेँ न्यायेबलय् छुं ग्यायेमाःगु आवश्यकता नं मदुगु दावी उमिसं यानाच्वंगु दु।
अज्याःगु थासय् खास यानाः म्हो जक ध्यबा दुपिं तर बालं च्वने मयःपिं मनूतय्सं अनधिकृत रुपं छेँय् न्यायेगु यानाच्वंगु खँ सीदुगु दु । बालं पुलाः च्वनेगु स्वयां अज्याःगु छेँ न्यानाः च्वनेबलय् फाइदा जुइगु जुयाः अन छेँ न्याः वइपिं नं दुगु खँ धाःगु दु। न्हापा न्हापा खुसि सिथय् च्वंगु आपालं जग्गाय् सुकुम्बासीया नामय् मेपिं हे मनूतय्सं कब्जा यानाः अन कर्पिंत बालं बीगु यानाच्वंगु खः। आः उकी नं विकास जुयाः छेँ हे मीगु ज्या नं शुरु जुया वःगु दु।
सुकुम्बासी वस्तीया छँे न्याये–मीगु ज्या येँया आपालं सुुकुम्वासी वस्तीइ जुयाच्वंगु दु । तर उकी आः तक गुगुं नं सरकारी निकायं पनेगु ज्या धाःसा याःगु मदुनि। निर्वाचनया इलय् थीथी राजनीतिक पार्टीया भोट बैंक जुइगु जुयाः सुकुम्बासी बस्तीयात सरकारं थनेगु कुतः मयाःगु खः ।
LEAVE YOUR COMMENTS