छम्ह छुँचित बचे यायेत गुम्ह उद्धारकर्मी

एजेन्सी- जर्मनीया बेंसहाइमय् जनावरतय्त बचे याइगु उद्धारदलय् छगू अजूचायापुगु फोन वल– धःया मेनहोलया पुसाया ह्वतय् छम्ह ग्वाराम्ह छुँचा फँसे जुयाच्वन, वयात बचे यायेमाल ।
उद्धारदलया माइकल सेहरया कथं व छुँचा चिकूगु कारणं ग्वारामारा चिनाच्वन, अले मेनहोलं पिहां वयेत स्वःबलय् बछि पिने, बछि दुने लानाः पिहां वयेमफेक कानाच्वंगु खः ।

फोन वयेवं छुँचित बचे यायेत छगू गुम्ह उद्धारकर्मी दुगु तःधंगु उद्धारदल घटनास्थलय् थ्यन, अले बचाउ अभियान न्ह्याकल । छम्ह छुँचित बचे यायेत थपाय्धंगु कुतः छाय् धकाः न्यंबलय् सेहरं धाःगु दु, ‘गुम्ह जनावरयात झीसं मयःसां वयात नं सम्मान यायेमाः ।’

‘चिधिकम्ह जनावर’ नांया कोड बियाः बचाउ अभियान सुरु याःसां व छुँचित तुरुन्त पिकाये धाःसा मफुत । अथे जूबलय् विभागया पुरा टिमया ग्वाहालिं मेनहोलया पुसा ल्ह्वन, अले जक उम्ह छुँचित बल्लतल्ल ह्वतं पिकायेफत । ह्वतं पिहां वयेवं छुँचित हाकनं व हे धलय् तुं त्वःताबिल, गनं व पिहां वयेत स्वःगु खः । छुँचित बचे यायेगु तस्बिर सामाजिक सञ्जालय् तःबलय् थुकी यक्वसिनं कमेन्ट यासें उद्धारकर्मीतय् तारिफ याःगु दु ।