कारबाहीलय् लानाः कमाण्डर बहा अबु अल–अता मंत

येँ (एएफपी)÷ इजरायलया सेनां प्यालेष्टिनी इस्लामिक जेहाडी लडाकू पुचःया नेताया छेँय् म्हिगः सुथय् याःगु कारवाहीइ लानाः उगु पुचःया कमाण्डर बहा अबु अल–अता सीगु दु । उगु कारवाहीइ लानाः निम्ह सीगु खःसा उकी छम्ह जेहाडी पुचःया नेता अबु अल–अता व मेम्ह वया जहान जूगु इजरायली सेनां धाःगु दु ।

प्यालेष्टाइन अधिनष्ठ गाजा क्षेत्रय् इजरायली सेनां याःगु आक्रमणय् निम्ह सीगु स्वास्थ्य मन्त्रालयं नं पुष्टि याःसां इमिगु नां सार्वजनिक याःगु मदुनि । मेखे इजरायली सेनां छगू विज्ञप्ति जारी यासे धाःगु दु ‘इजरायली सेना व इजरायलया शिन बेट आन्तरिक सुरक्षा बलं याःगु मंकाः कारवाहीइ लानाः प्यालेष्टिनी कमाण्डर अल–अता व वय्कःया जहान घटनास्थलय् मदुगु खः ।’

अथे हे स्थानीय वासिन्दां नं अताया छेँय् तःधंगु आवाज सहित विस्फोट जूगु खँ धाःगु दु । थुकिया दथुइ अतां नेतृत्व यानाच्वंगु इस्लामिक पुचलं नं घटनाय् थः कमाण्डर सीगु पुष्टि याःगु दु । उगु पुचलं अताया छेँयात उच्च सुरक्षा घेराय् तयाःतःगु खँ धाःगु दु ।