नोबेल विजेता डेसमन्ड टुटु मंत

एजेन्सी- दक्षिण अफ्रिकाया नोबेल शान्ति पुरस्कार विजेता डेसमन्ड टुटु मंत । टुटु ९० दँया वैशाय् स्थानीय ई कथं आइतवाः सुथयु केप टाउनय् मदुगु खः । दक्षिण अफ्रिकी राष्ट्रपति सिरिल रामाफोसां छगू विज्ञप्ति जारी यासें डेसमण्ड टुटु मदुगु पुष्टि यानादीगु खः ।

दक्षिण अफ्रिकाय् रंगभेद अन्त्य यायेत मू भूमिका म्हितूपिं मध्ये डेसमन्ड टुटु न छम्ह खः । राष्ट्रपति रामाफोसां विज्ञप्तिइ दक्षिण अफ्रिकाय् स्वतन्त्रता चूलाकेत टुटुं अग्रस्थानय् च्वनाः ग्वाहालि याःगु खँ धयादीगु दु ।

नेसन्ल मन्डेलाया समकक्षी टुटुं सन् १९४८ निसें १९९१ तक दक्षिण अफ्रिकाय् रंगभेद अन्त्य यायेत जूगु आन्दोलनय् मू व्यक्ति जुयाः ग्वाहालि याःम्ह खः । वय्कःयात सन् १९८४ य् नोबेल शान्ति सिरपाः लःल्हाःगु खः ।

इसाई पादरी टुटुं दक्षिण अफ्रिकाय् तुयुपिं शासकतय् विरुद्धया थःगु संघर्ष छुं राजनीतिक कारणं मखु धाइम्ह खः । वय्कलं जीवंकाछि अश्वेततय् पक्षय् संघर्ष याःसां थःगु उद्देश्य धार्मिक जक जूगु खँ धयादी ।