रोनाल्डोया नकतिनि बूम्ह काय सित

एजेन्सी- पोर्चुगलया स्टार कासामि क्रिष्टियानो रोनाल्डोया नकतिनि बूम्ह ह्याउँमचा सीगु दु । रोनाल्डों बिउगु जानकारीकथं छक्वलं बूपिं काय व म्ह्याय् मध्ये कायम्ह सीगु खः ।

म्याचेस्टर युनाइटेडया कासामि रोनाल्डो व रोनाल्डोया प्रेमिकाया जोर्जिना रोड्रिगेजं छक्वल बूपिं निम्ह मस्त मध्ये छम्ह सीगु जानकारी सोमवाः बहनी समाजिक सञ्जाल मार्फत बिउगु खः । रोनाल्डाें धाःगु दु, ‘छ जिमि ऐन्जल खः । जिमिसं छन्त माया यानाच्वने ।’ रोनाल्डो थः तसकं दुःखी जूगु धाःगु खः । म्ह्याय् बूगुलिं थःपिं लय्ताःगु नं रोनाल्डाें धाःगु दु । रोनाल्डोया मेपिं स्वम्ह मस्त दु ।