पलेस्वां पुखू अतिक्रमणयात कयाः देय् दबुलिं सरोकार क्यन : अदालतं याकनं निर्णय बीत माग
येँ (नेपालभाषा टाइम्स) – थँबहीया ऐतिहासिक पलेस्वां पुखू अतिक्रमण यानाः व्यापारिक भवन दयेकातःगु खँय् नेवाः देय् दबुलिं नं सरोकार क्यंसें थुकिया तकयाः सर्वोच्च अदालतय् लानाच्वंगु मुद्दाय् याकनं निर्णय बीत माग याःगु दु । देय् दबुलिं म्हिगः छगू विज्ञप्ति पिथँसें अदालतपाखें ऐतिहासिक तथ्य, प्रमाण व कानुनी आधारय् याकनं निष्पक्ष निर्णय यायेमाःगु, नेपाल सरकारया सम्बन्धित निकाय लिसें येँ महानगरपालिकां सार्वजनिक गुथि सम्पदाया संरक्षण सुनिश्चित यासें अभिलेख सम्बन्धी विवादया निष्पक्ष छानबिन यायेमाःगु माग याःगु खः ।
पलेस्वां पुखुलिइ दयेकूगु छायाँदेवी कम्प्लेक्सयात कयाः लानाच्वंगु मुद्दाय् थ्वहे वइगु असार १८ गते पेशी क्वःछिनातःगु दु । थ्व स्वयां न्ह्यः नं तःक्वःतक पेशी क्वछीधुंकूसां न्ह्याबलें स्थगित जुइगु जक जुयाच्वंगु खः पलेस्वां पुखू संरक्षणं लगे जुयाच्वनादीम्ह अभियन्ता भागवत नरसिंह प्रधानं कनादीगु दु ।
२०३३ सालय् हे सर्वोच्च अदालतं गुथिया नामय् पुखू व चोक कायम जुइकथं मिलापत्र यानाबिउगु, वयां लिपाया स्वामित्व सम्बन्धी विवाद, गुथि जग्गाया निजीकरणया कुतः लिसे अभिलेख व्यवस्थापन सम्बन्धी ब्वलंगु न्ह्यसलय् निष्पक्ष कानुनी परीक्षण आवश्यक जूगु खँ नं विज्ञप्तिइ धयातःगु दु ।
देय् दबुलिं पिथंगु वक्तव्यय् थ्व अतिक्रमण पलेस्वां पुखूया जग्गाया स्वामित्वया विषय जक मखुसे नेवाः सभ्यता, गुथि परम्परा, धार्मिक सांस्कृतिक सम्पदा, ऐतिहासिक स्मृति व आदिवासी समुदायया मंकाः अधिकार लिसे प्रत्यक्ष स्वाःगु राष्ट्रिय सरोकारया विषय जूगु खँ धयातःगु दु ।
सार्वजनिक सम्पत्ति, गुथिया सम्पत्तियात निजी स्वार्थया निंतिं छ्यलेगु ज्यां नेपाःया सांस्कृतिक सम्पदा संरक्षणया मू मर्मय् आघात लानाच्वंगु खँ विज्ञप्ति धयातःगु दु ।
नेपाःया संविधान, प्रचलित कानुन, गुथि व्यवस्था सम्बन्धी कानुनी व्यवस्था लिसें नेपाः पक्ष राष्ट्र जूगु अन्तर्राष्ट्रिय प्रतिबद्धता कथं नं आदिवासी समुदायया सांस्कृतिक सम्पदा, गुथि परम्परा व ऐतिहासिक सम्पदाया संरक्षण राज्यया दायित्व जूगु खँ नं विज्ञप्तिइ लुमंकातःगु दु ।
उकथं हे विज्ञप्तिइ विकास आवश्यकता खःसां नं सांस्कृतिक सम्पदा, सार्वजनिक गुथि लिसे आदिवासी समुदायया म्हसिका नष्ट जुइकथं याइगु विकास दिगो विकासया सिद्धान्त ज्वःमलाःगु खँ नं धयातःगु दु ।
अथेहे पुरातात्विक, धार्मिक व सांस्कृतिक महत्वं जाःगु पलेस्वां पुखू मौलिक स्वरुपय् संरक्षण व पुनस्र्थापनाया निंतिं माःगु पहल यायेत नं इनाप यानातःगु दु ।
LEAVE YOUR COMMENTS