आः प्वाथय् दुम्ह मचायात नं अंश !

येँ – आः तक सगोलया सम्पत्तिया अंशबण्डा जुइबलय् मचा बुइधुंकाः जक ब्वथलेगु यानाच्वंगु खःसा आः धाःसा अंशबण्डा जुइगु जुइगु इलय् सुं अंशियार मिसाया प्वाथय् दुसा उम्ह प्वाथय् दुम्ह मचायात नं अंश भाग बीगु जूगु दु ।

थ्वहे वइगु भदौ १ गते निसें लागू जुइत्यंगु मुलुकी देवानी (संहिता), २०७५ व थ्व सम्बन्धी कार्यविधिइ अंशबण्डा यायेबलय् सुं नं मिसा अंशियारया प्वाथय् दयाच्वंगु जूसा उम्ह मिसां बुइकीम्ह मचाया लागिं नं अंश ब्वथलेमाःगु न्हूगु व्यवस्था याना तःगु खः ।

सगोलया सम्पत्तिइ भाःत, कलाः, अबु, मां, काय, म्ह्याय् अंशियार जुइगु व्यवस्था आः दयाच्वंगु खः । तर आः अंशियार जूम्ह मांया प्वाथय् च्वंम्ह मचायात नं जन्म जुइ न्ह्यः हे अंश ब्वथलेमाःगु जूगु दु ।

मांया प्वाथय् च्वँसांनिसें अंश काये दइगु कानुनी व्यवस्थां यानाः आः काय व म्ह्याय् दथुइ कायम जुयाच्वंगु विभेदया नं अन्त्य जुइगु विश्वास अधिकारकर्मीतय्सं याःगु दु । काययात अप्वः प्राथमिकता बीपिं छेँजःपिंसं नं आः बाध्य जुयाः म्ह्याय्यात नं समान हक बीमाःगु जूगु दु ।

थुकिं यानाः आः अंशबण्डा जूगु इलय् अंशियार मिसापाखें जन्म जुइम्ह मचां नं समान अंश कायेफइगु जूगु दु । छुं गथें जुयाः मचा बुइ न्ह्यः हे सित वा मचा कुहां ल धाःसा उगु सम्पत्ति सगोलय् हे भाग लगे जुइगु व्यवस्था नं कार्यविधिइ यानातःगु दु ।