ताम्राकार छेँजःयात ग्वाहालि यायेत ज्याझ्वः

येँ – थनया रत्नपार्क विद्युत प्राधिकरण न्ह्यःने गाडी क्ययेकाः स्याःम्ह स्थानीय गौतम ताम्राकारया छेँजःपिनि ग्वाहालि कथं नेपालभाषाया फिल्म ‘अंश’ क्यनीगु जूगु दु । थ्वहे वइगु माघ २८ गते बालाजुया अष्टनारायण हलय् उगु नेवाः फिल्म क्यनाः आर्थिक संकलन यायेत्यनागु खँ थ्व ज्याय् सक्रिय जुयाच्वंगु संघर्ष समितिया संयोजक यादवलाल कायस्थं ‘नेपालभाषा टाइम्स’ यात कनादिल । वंगु भाद्र ७ गते गोठाटार यातायात व्यवसायी संघया बा. २ ख ७८०६ नम्बरया गाडीं न्ह्यःने खंक खंक हे क्ययेकाः भाजु ताम्राकारया हत्या याःगु खः ।

थुकियात कयाः न्ह्यानाच्वंगु मुद्दाया झ्वलय् गाडी चालक रामप्रसाद पौडेलयात आः कुनाः हे अदालती कारवाही न्ह्याकेगु जुइ धकाः उच्च अदालतं फैसला याःगु दुसा फैसला लिपा चालक पौडेल फरार जुयाच्वंगु दु । थुकिया लागिं स्थानीय ल्याय्म्हत जानाः नीस्वंगु संघर्ष समितिं छखे चालकयात कारवाही याकेत कानुनी मुद्दा ल्वानाच्वंगु दुसा मेखे पीडित छेँजःयात आर्थिक ग्वाहालि चूलाकेगु अभियान नं न्ह्याकाच्वंगु दु । थुकिया मुद्दा ल्वायेगु ज्याय् आः तक वकिल खर्च कथं ३५ हजार तका खर्च जुइधुंकूगु खँ नं संयोजक कायस्थं कनादिल । थप आर्थिक संकलनया लागिं २८ गते जुइगु नेवाः फिल्मया च्यारिटी शोया टिकट न्यानाः ग्वाहालि यानादीत नं वय्कलं सकलसितं इनाप यानादीगु दु ।