जावलाख्यलय् बुंगद्यःया म्युजियम दयेकीगु

यल (नेपालभाषा टाइम्स)-थनया जावलाख्यलय् बुंगद्यः सम्बन्धी म्युजियम दयेकीगु जूगु दु । उकिया लागिं छेँ दनेगु ज्या शुरु जूगु दु । दँय्दसं जुइगु बुंगद्यःया जात्रा जावलाख्यलय् थ्यंकाः क्वचायेकी । बुंगद्यःया जात्रायात स्वनिगःया दकलय् ताःहाकःगु जात्रा धाइ । जात्राया झ्वलय् जावलाख्यलय् प्यन्हु तक रथ तइगु जुयाः बुंगद्यःया म्युजियम नं थन हे दयेकेत्यंगु खः ।

यल उपमहानगरपालिका वडा नं. ४ या अध्यक्ष सन्तोष खड्काया कथं यल मनपाया हे ८५ लाख तकाया बजेटं थ्व म्युजियम दयेकेत्यंगु खः । थुकी बागमती प्रदेश सरकारं नं ४५ लाख तका दां बीगु सहमति जूगु दु ।

आः म्युजियम दयेकेत्यंगु थासय् ऐतिहासिक फल्चा नं दु । बुंगद्यःया जात्रा जुइबलय् मत च्याकः वइपिं मनूत थ्वहे फल्चायय् च्वनीगु खः । उगु फल्चा स्यनेवं अन ट्राफिक प्रहरी च्वनेगु शुरु जूगु खः ।

वडा अध्यक्ष खड्काया कथं आः दयेकेत्यंगु म्युजियम मुक्कं नितँजाः जुइ । अन बुंगद्यः व बुंगद्यःया जात्रालिसे सम्बन्धित फुक्कं ज्वतंत तयेगु याइ । म्युजियमय् तयेगु लागिं बुंगद्यःलिसे सम्ब्न्धित ऐतिहासिक महत्वःया ज्वलं मुंकेत माःगु तयारी नं जुइधुंकूगु दु ।

बुंगद्यःया रथ जात्रा जुइबलय् रथ दयेकेत छ्यलीगु ज्वलंत फुक्क जात्रा क्वचायेवं जावलाख्यलय् हे तयेगु याइ । तर अन माःगु व्यवस्था मदुगु जुयाः
रथया ज्वलंत नं न्हियान्हिथं स्यना वनाच्वंगु दु । थुकिया संरक्षण यायेगु लागिं नं म्युजियमया व्यवस्था यायेत्यंगु खः ।