डोपिङय् भेदभाव याःगु सेरेनाया द्वपं

अमेरिकी टेनिस स्टार सेरेना विलियम्सं डोपिङ टेस्टया झ्वलय् थःत भेदभाव याःगु द्वपं बिउगु दु । नीस्वंगू एकल उपाधी त्याकेधुंकूम्ह विलियम्सं छगू ट्विट यासें थःत भेदभाव जूगु खुलासा याःगु खः । ‘मेपिं कासामि सिबें जिगु अप्वः ड्रग टेस्ट जूगु दु, थ्व भेदभाव खः । जितः अथे हे ताः’ सेरेनां ट्विटय् धयातःगु दु ।

जुन महिनाय् डेडस्पिन नांगु छगू वेबसाइटय् पिदंगु छपु लेखय् सन् २०१८ य् जक सेरेनाया न्याक्वः तक डोपिङ टेस्ट जुइ धुंकूगु दु । अझ वं छुं प्रतियोगिताय् ब्वति कया मच्वंगु इलय् तकं टेस्ट जूगु दु । उगु लेखय् वंगु १४ जुनय् अमेरिकी अधिकारीत टेस्टया लागि सेरेनाया छेँय् वंबलय् सेरेना छेँय् मदुगु खँ न्ह्यथनातःगु खः ।

तर सेरेनां धाःसा उपिं अधिकारीत थःत धयातःगु स्वयां झिंनिघौ न्ह्यः वःगुलिं नापलाःगु स्पष्टीकरण बिउगु दु । अमेरिकी अधिकारीतय्सं थुकियात ‘मिस्ड टेस्ट’या धलखय् दुथ्याकूगु दु । यदि थथे स्वक्वः तक मिस जुल धाःसा डोपिङ नियम उल्लंघन जूगु माने याइ । थ्व लेख पिहांवःबलय् तक दुने सेरेना विलियम्स मेपिं कासामि सिबें लगभग डबल ड्रग टेस्ट यायेधुंकूगु दु ।

सम्बन्धित बुखँ

LEAVE YOUR COMMENTS