येँ मनपां विवरण बुझे मयाःगु सहकारीयात कारवाही याइगु

येँ – येँ महानगरपालिकां आः महानगर दुनेया विवरण बुझे मयाःगु सहकारी संस्थायात कारवाही याइगु जूगु दु । येँ मनपां साधारणसभा यानाः उकिया विवरण बुझे मयाइगु सहकारीयात कारवाही यायेगु प्रक्रिया न्ह्याकेत्यंगु खः । साधारणसभा यानाः नं उकिया विवरण थःथाय् बुझे मयाःगु सहकारीया अनुगमन यानाः कारवाही यायेगु निंतिं प्रक्रिया न्ह्याकेत्यनागु येँ मनपां सहकारी विभागया प्रमुख नमराज ढकालं कनादीगु दु ।

वंगु आइतवाः ‘सहकारीया सुसंचालनय् शेयर सदस्यया भूमिका’ विषयय् जूगु तालिम ज्याझ्वलय् नवासें विभागया प्रमुख ढकालं उगु खँ धयादीगु खः । वय्कलं साधारणसभा यानाः उकिया विवरण महानगरपालिकाय् बुझे मयासे च्वनाच्वंगु सहकारी संस्थाया अनुगमन यानाः कारवाहीया प्रक्रिया न्ह्याकेत्यनागु धयादीगु दु ।

येँ मनपां थःगु मातहतया सहकारी संस्था संचालनया निंतिं ‘सहकारी ऐन–२०७४’ जारी याःगु दु । थौंकन्हय् येँ महानगरपालिका दुने करिब १,८५६ गू सहकारी संचालन जुयाच्वंगु दुसां तसकं म्हो जक सहकारी संस्थां थःगु विवरण महानगरपालिकाय् बुझे याःगु दु । येँ मनपा सहकारी विभागयाकथं ४८० सहकारी संस्थां जक साधारणसभाया विवरण बुझे याःगु दु ।