देय्या धुकू गडबड जुइवं सरकारयात अय्लाः लुमनावल

येँ (नेपालभाषा टाइम्स) – सरकारया धुकू खाली जुया वनेवं सरकारं थःम्हं मनातःगु विदेश अय् लाःया आयातयात चायेकाबिउगु दु। तत्कालिन अर्थमन्त्री युवराज खतिवडाया पालय् कोरोनाया महामारी सुरु जुइवं विदेशी अय्लाः आयातय् प्रतिबन्ध तयाबिउगु खः । प्रधानमन्त्री केपी ओलीया यःम्ह मन्त्री जुयाच्वंगु खतिवडाया प्रस्तावय् तयातःगु थ्व प्रतिबन्ध खतिवडा मन्त्रीं चिलावंगु छुं न्हि लिपा हे मन्त्रिपरिषद्ं हे निर्णय यानाः चिइकूगु खः ।

खतिवडां कोरोनाया महामारी जुइवं विदेश मुद्रा पिहां वनी धकाः वंगु चैत महिनाया १६ गते निसें थ्व प्रतिबन्ध तःगु खः । तर आः सरकारी धुकू हे खाली जुया वयेवं राजश्व म्हयेगु निंतिं मन्त्रिपरिषद्ं गु निर्णययात उल्टो याःगु खः । कोरोना महामारीया कारणं आर्थिक गतिविधि बांलाक मन्ह्याःगु कारणं सरकारं लक्ष्य तयातःकथं राजश्व म्हयेफयाच्वंगु मदु। राजश्व म्हये मफयाः सरकारया धुकुटीइ नगद प्रवाहया हे समस्या जुयावयेवं सरकारं आन्तरिक त्यासा तकं कायेधुंकूगु दु। थज्याःगु अवस्थाय् आः राजश्व उठे यायेफइगु जूगुलिं विदेशी आयलाः दुकायेत्यंगु खः ।

उद्योग, वाणिज्य तथा आपूर्तिमन्त्री लेखराज भट्टं अर्थ मन्त्रालयं राजश्व संकलनय् ग्वाहालि जुइगु अपेक्षा क्यंगुलिं पूवंक आयात खुला यानागु खँ धयादीगु दु। वय्कलं धयादीगु दु, ‘अर्थ मन्त्रालयं राजश्व संकलन म्हो जुल, विदेशी मुद्राय् नं उलि समस्या मदु धाःगुलिं खुला यानागु खः ।’ वय्कःया थ्व धापुतिं नं देय्या धुकुतिइ हे कोरोनाया प्रभाव लाःगु खनेदुगु दु ।

नेपालय् दँय् थ्यंमथ्यं छगू अर्ब तका बराबरया विदेशी अय्लाः दुहां वयेगु याः । थथे दुहां वइगु अय्लाखं दँय् निगू अर्ब धयाथें राजश्व संकलन जुयाच्वंगु दु। अय्लाः आयात यायेबलय् विदेशी मुद्रा पिहां वनीगु स्वयां नं राजश्व अप्वः दुहां वइगु जूगुलिं नं सरकार अय्लाः आयात चायेकेत तत्पर जूगु खः ।

सरकारया हे छम्ह उच्च अधिकारीं बिबिसीलिसे खँ ल्हासें धाःगु दु, ‘देय् या धुकुतिइ हे गडबड जुइगु खनेदयेवं सरकारयात अय्लाः लुमनावल धाःसां ज्यू ।’ सरकारं थुगुसी न्हापांगु स्वला दुने सवा दुई खर्ब राजश्व मुंकेगु लक्ष्य तयातःगु खः, तर डेढ खर्ब स्वयां म्हो जक उठे जूगु दु। अथे जूगुलिं नं सरकारयात खर्च यायेत नगदया हे समस्या जुयावःगु दु। मोहनीबलय् तलब व भत्ताय् जक हे अर्बौं ध्यबा खर्च जुइ, उकिं सरकारं आन्तरिक त्यासा कायेधुंकूगु दुसा राजश्व म्हयेगु निंतिं जोडतोड यानाच्वंगु दु ।

अथे मोहनी थेंज्याःगु तःधंगु नखः न्ह्यःने वःगुलिं नं व्यापारीतय् दबाबं नं अय्लाःया आयातय् प्रतिबन्ध चिइकूगु खः । मोहनी स्वन्ति नखःबलय् नेपालय् दछियंकं खपट जुइगुया स्वब्व छब्व अय्ला खपट जुइ । थज्याःगु इलय् व्यापार यायेमाःगुलिं नं ब्यापारीतय् तच्वःगु दबाब लाःगु खँ धाःगु दु ।