
येँ – येँ महानगरपालिका अन्तर्गत लाःगु फुक्कं सरकारी व निजी स्कूलय् ब्वंकीगु ‘स्थानीय विषय’ या पाठ्य सफू च्वयेगु लागिं पाठ्यक्रम तयार याःगु दु । येँ महानगरपालिका अन्तर्गत गठन यानातःगु पाठ्यक्रम निर्माण सम्बन्धी समितिं थ्व पाठ्यक्रम तयार याःगु खःसा शुक्रवाः उकियात कयाः प्रवोधिकरण (सहलह लिसें सुझाव) ज्याझ्वः जुल ।
स्थानीय तहपाखें ब्वंकीगु स्थानीय विषयया थ्व पाठ्यक्रम नेपालभाषा, खस नेपाली व अंग्रेजी भासं तयार दयेकेगु ज्या जुयाच्वंगु दु । शुक्रवाः नेपालभाषाया पाठ्यक्रम बारे ज्याझ्वः जूगु खः । समितिं १ तगिंनिसें ८ तगिं तकया नेपालभाषा पाठ्यक्रम तयार याःगु दु ।
स्थानीय विषयया पाठ्यक्रम स्वंगू भासं तयार जुयाच्वंसां येँ महानगरपालिका अन्तर्गतया सरकारी व निजी फुक्कं स्कूलय् नेपालभाषां हे थ्व छगू विषय ब्वंकेमाः धकाः भाषिक अभियन्तातय्सं सः तया वयाच्वंगु दु ।
प्रवोधिकरण ज्याझ्वलय् डा. चुन्दा वज्राचार्य, डा. ओमकारेश्वर श्रेष्ठ, कृष्णभक्त मानन्धर, वरुणप्रसाद वैद्य लिसें कामपा शिक्षा विभागया कावा प्रमुख तारापति खरेलपिंसं न्ववानादीगु खः ।
LEAVE YOUR COMMENTS