नेपाःया मैदानय् एकदिवसीय श्रृंखला जुइला ?
नेपालं वंगु छुं दिं न्ह्यः जक संयुक्त अरब इमिरेटस् (युएई)य् जूगु स्वंगू एकदिवसीय व टि–२० क्रिकेटया श्रृंखला हे त्याकेत सफल जूगु खः । थ्व नेपाली कासामि, कासाख्यः व कासाप्रेमीया निंतिं लसताया खँ खः । तर थ्व खँ न्यने मात्रं अजू चायापु कि, एकदिवसीय व टि–२०या श्रृंखला त्याकेत सफल जूगु नेपालय् छगू नं एकदिवसीय श्रृंखला म्हितकेगु मैदान धाःसा मदु ।
एकदिवसीय मान्यता प्राप्त याःगु करिब दछिया अवधि दुने नेपाली क्रिकेटं निगू अन्तर्राष्टिय एकदिवसीय श्रृंखला म्हितल । न्हापांगु श्रृंखला बराबरीइ क्वचाःगु खःसा निगूगु श्रृंखलाय् नेपालं ऐतिहासिक विजय प्राप्त यायेत सफल जुल । अझ टि–२० इ ला न्हापांगु श्रृंखला तकं त्याकेत सफल जूगु दु । तर, नेपालय् धाःसा श्रृंखला आयोजना यायेगु अवस्था आतक नं मदु ।
दतं फतं छगू जक मैदान किपुलिइ च्वंगु त्रिवि मैदान नं दँदँ न्ह्यवंनिसें मर्मत जुइ फयाच्वंगु मदु । किपुलिइ च्वंगु त्रिवि मैदानं जक कःघाना वयाच्वंगु नेपाली क्रिकेटया साख ल्यंका तयेत आः गबले तक थ्व मैदानया भरय् च्वना च्वनेगु खः ? धइगु न्ह्यसः ब्वलनाच्वंगु दुसा थुकिया लिसे नेपाली क्रिकेटया सरोकारवाला जिम्मेवार पदाधिकारीलसे नं मदु ।
क्रिकेट मैदानया पित हरेक प्यदँय् मर्मत यायेमाः तर त्रिविया क्रिकेट मैदान च्यादँ दयेधुंकाः नं आतक नं मर्मत जुइ मफुगुलिं थुकिया गुणस्तर नं कुहां वनाच्वंगु दु । नेपालय् एकदिवसीय श्रृंखला म्हितके फइ कि फइमखु धकाः आः नकतिनि हे जक अध्ययन शुरु जूगु दु । एकदिवसीय मान्यता कायेधुंकाः नेपालं नं घरेलु मैदानय् श्रृंखला आयोजना यायेगु निंतिं चिउताः क्यना वयाच्वंगु दु ।
अन्तर्राष्ट्रिय क्रिकेट काउन्सिल (आइसीसी)या प्रतिनिधि एण्डी
अट्किन्सन नेपाः वःगु खः । एण्डीं किपूया क्रिकेट मैदानया निरीक्षण नं याःगु खः । अथे हे मूलपानीइ निर्माणाधीन अवस्थाय् दुगु मुलपानी क्रिकेट मैदानया नं निरीक्षण याःगु खः । वय्कलं मैदानया अवस्थाया बारे आइसीसीयात प्रतिवेदन लःल्हानादी ।
तर क्रिकेटया आधिकारिक निकाय नेपाल क्रिकेट संघ (क्यान) निलम्बनय् लानाच्वंगु दुसा छगू जक अन्तर्राष्ट्रिय धयातःगु किपूया त्रिवि क्रिकेट मैदान पुनःनिर्माण यायेमाःगु अवस्थाया कारणं नेपालय् तत्काल श्रृंखला आयोजना यायेगु अवस्था नं मदु । नेपाःया मैदान एकदिवसीय श्रृंखला म्हितकेत योग्य जू कि मजू धकाः जाँच याये छुं दिं न्ह्यः अन्तर्राष्ट्रिय क्रिकेट काउन्सिल (आइसीसी)या प्रतिनिधि एण्डी अट्किन्सन नेपाः वःगु खः ।
एण्डीं किपूया क्रिकेट मैदानया निरीक्षण नं याःगु खः । अथे हे मूलपानीइ निर्माणाधीन अवस्थाय् दुगु मुलपानी क्रिकेट मैदानया नं निरीक्षण याःगु खः । वय्कलं मैदानया अवस्थाया बारे आइसीसीयात प्रतिवेदन लःल्हानादी । आइसीसीं एण्डीया हे प्रतिवेदनया लिधंसाय् नेपाःया क्रिकेट मैदान श्रृंखला म्हितकेत योग्य जू कि मजू धइगु क्वःछी ।
नेपाली राष्ट्रिय क्रिकेट टोलीया मुख्य प्रशिक्षक जगत टमाटां धयादिल, ‘एण्डीं प्रतिवेदन बुझे यायेधुंकाः आइसीसीं त्रिवि क्रिकेट मैदानयात एकदिवसीय कासाया निंतिं योग्य यायेत यायेमाःगु आवश्यक ज्याया बारे सुझाव बी, अले व हे कथं सुधार याये फत धाःसा नेपाःयात एकदिवसीय क्रिकेटया श्रृंखला आयोजना यायेगु लँपु नं चाली ।’
त्रिवि क्रिकेट मैदानया सुरक्षाया विषयय् आइसीसीं चिउताः क्यंगु दु । उकिं सरकारं सुरक्षाया विषययात कयाः आइसीसीयात विश्वस्त याये फयेकेमाः । भौतिक पूर्वाधार निर्माणय् नं सरकारं हे ज्या यायेमाःगु जुइ । क्यान निलम्बनया अवस्थाय् राष्ट्रिय खेलकुद परिषद् (राखेपं) बजेट छुटे यानाः ज्या याःसा जक त्रिवि क्रिकेट मैदानय् एकदिवसीय श्रृंखला म्हितेगु मान्यता काये फइ ।
हालय् जक युएईइ जूगु श्रृंखलाय् नेपाली क्रिकेट कासामिपिंसं नायकत्वया प्रर्दशन यायेधुंकूगु दु । अझ छुं कासामिं ला विचाः याःगु स्वयां नं च्वय्या स्तरया प्रदर्शन यानाः नेपाली क्रिकेट कासाया भविष्य उज्वल जूगु संकेट तकं बीधुंकूगु दु । तर स्तरीय पूर्वाधार मदुगुलिं व क्यान निलम्बनया फुकुवाया निंतिं उचित पहल मजुयाच्वंगुलिं नेपाली कासामिं क्यंगु क्रिकेटया उज्वल भविष्यया संकेत गनं खिउँगु थासय् वा ध्यानकुनय् जकं लाः वनीगु खःला धइगु आशंका नं ब्वलना वयाच्वंगु दु ।
युवा तथा खेलकुद मन्त्री जगतबहादुर विश्वकर्मां किपूया मैदान मर्मतया निंतिं मन्त्रालयं ताकेता यायेगु जुइ धयादिल । वय्कलं धयादिल, ‘आइसीसीं धाःथें विधान संशोधन जुइधुंकूगु दु, क्यानया निर्वाचित पदाधिकारीं अदालतय् दायर याःगु मुद्दा लित कायेगु निंतिं नं प्रक्रिया शुरु जुइधुंकूगु दु, आः याकनं हे क्यानया निलम्बन फुकुवा जुइ ।’
कासामिपिंत म्हितेगु उचित वातावरण, पूर्वाधार व पारिश्रमिकया निंतिं सरकार प्रतिवद्ध दुगु धासें वय्कलं म्हिताः भविष्य सुनिश्चित याये फइगु अवस्थाय् थ्यंकेत सरकार प्रतिवद्ध दुगु जिकिर यानादिल । वय्कलं मुलपानी क्रिकेट मैदान निदँत्याया दुने निर्माण सम्पन्न जुइगु न्ह्यथँसें थः मन्त्री जुइ न्ह्यःया दक्वं समस्या सामाधान यानाः निर्माण प्रक्रिया शुरु जुइधुंकूगु धयादिल ।
क्रिकेट प्रशिक्षक राजु बस्नेतं नेपाली क्रिकेटयात छगू उचाइलय् थ्यंकूगु दु धासें पूर्वाधान निर्माण मजुइगु धइगु दुःखद् विषय खः धयादिल । वय्कलं धयादिल, ‘नेपाः स्वयां नं कम वरियता प्राप्त जूगु देसय् नेपाःया स्वयां नं आपालं पूर्वाधारया विकास जूगु दु, झीगु अवस्था धाःसा तसकं लज्जा चायापु ।’
एकदिवसीय मान्यता प्राप्त याःगु दछि पूवनेत्यंगु इलय् नेपालं आतक जम्मा निगू जक श्रृंखला म्हितूगु दु । थगुने चैत महिनाय् एकदिवसीय मान्यता प्राप्त याःगु नेपाली क्रिकेटं नेदरल्याण्डस व युएई विरुद्ध इमिगु हे घरेलु मैदानय् श्रृंखला म्हितूगु खः ।
नेपाली क्रिकेटया निंतिं थप सफलताया त्वाथः गयेत जक मखसे आः प्राप्त जूगु उपलब्धियात ल्यंका तयेगु नं चुनौतिपूर्ण जू । थुकिया निंतिं क्यानयात तयातःगु आइसीसीया निलम्बन फुकुवा अत्यावश्यक जू । झिदँ न्ह्यः डिभिजन–५ य् दुगु नेपालं प्रतिकूल घरेलु वातावरया बावजूद नं एकदिवसीय मान्यता प्राप्त याःगु खः ।
LEAVE YOUR COMMENTS