च्यागू मिनेट दुने स्वंगू गोल, रोनाल्डो युरोय् दकलय् अप्वः गोल याःम्ह कासामि

येँ– अन्तिम ८ मिनेट दुने स्वंगू गोल यासें पोर्चुगलं हंगेरीयात ३–० गोलं बुकल । हंगेरीया बुडापेस्टय् ६० हजार घरेलु दर्शकयात निराश यायेगु झ्वलय् रोनाल्डां निगू गोल यात । रोनाल्डों छगू गोल पेनाल्टि पाखें याःगु खःसा छगू गोल कासा नियमित ई क्वचायेकाः थप जूगु ईलय् याःगु खः । थुकिया लिसें रोनाल्डां युरो कप आःतक दकलय् अप्वः गोल याःम्ह कासामि नं जूगु दु । पेनाल्टिया गोलं हे रोनाल्डो दकलय् अप्वः गोल याःम्ह कासामि जूगु खः । सन् २००४ निसें युरो कप म्हितूम्ह रोनाल्डों न्यागू युरोकप म्हिताः झिंछगू गोल याःगु दु । अथेहे रोनाल्डोया अन्तर्राष्ट्रिय गोलं १०६ गू थ्यंगु दु । अन्तर्राष्ट्रिय गोलया रेकर्ड त्वाःथलेगु निंतिं आः रोनाल्डों प्यंगू गोल जक याये ल्यंदनि ।

कासाया ८४ औं मिनेटय् रोफेल गुइरिरों पोर्चुगलया निंतिं न्हापांगु गोल याःगु खःसा थ्वयां ३ मिनेट लिपा हे रोफा सिल्भायात बक्स दुने क्वदयेकेवं पेनाल्टि बिउगु खः, गुकीयात रोनाल्डों याउँक गोल यानाबिउगु खः ।