किपा व निबन्ध कासाय् त्याःपिंत सिरपाः लःल्हात

येँ(नेपालभाषा टाइम्स)- सक्रिय युवा समाज मखं त्वाःया ग्वसालय् जूगु अन्तर माध्यमिक विद्यालयस्तरीय किपा च्वज्या कासा व च्वख धेंधेंबल्लाः कासाय् त्याःपिंत वंगु शुक्रवाः जूगु छगू ज्याझ्वःया दथुइ सिरपाः लःल्हाःगु दु । मखं त्वालय् च्वंगु समाजया ग्वसालय् छत्रपाति पार्टी पालेसय् जूगु ज्याझ्वलय् सिरपाः लःल्हाःगु खः ।

मूपाहां येँ महानगपालिकाया उपप्रमुख सुनिता डंगोलं त्वाःदेवाय् मत च्याकाः उलेज्या यानादीगु ज्याझ्वलय् वय्कलं किपा च्वज्या व च्वखँ कासाय् उत्कृष्ट जूपिंत सिरपाः लःल्हानादीगु खः ।

किपा च्वज्या कासाय् प्रदीपकुमार वज्राचार्य व विनोद प्रधान, च्वखँ कासाय् रमेशकाजी स्थापित व सन् साय्मि निर्णायक मण्डलय् च्वनादीगु खः । ज्याझ्वलय् मूपाहां उपप्रमुख डंगोल, निर्णायक मण्डलपिं प्रदीपकुमार वज्राचार्य व सन साय्मि नुगःखँ तयादीगु खः । समाजया नायः शैलेन्द्रविलास वज्राचार्यया सभापतित्वय् जूगु ज्याझ्वलय् वय्कलं मूपाहां निर्णायक मण्डलया दुजःपिंत मतिनाया चिं नं लःल्हानादीगु खः ।
समाजया ग्वसालय् वंगु मंसिर १ गते शनिवाः ‘झीगु सम्पदा व झीगु संस्कृति’ विषयय् किपा च्वज्या कासा व ‘सांस्कृतिक शहर समृद्ध महानगर’ विषयय् च्वखँ कासा जूगु खः ।

कासाय् जगतसुन्दर ब्वनेकुथि, बालसेवा माध्यमिक विद्यालय, महांकाल माध्यमिक विद्यालय, नेपाल आदर्श माध्यमिक विद्यालय, शान्ति निकुञ्ज माध्यमिक विद्यालयया ब्वँमिपिंसं ब्वति काःगु खः ।