स्वतन्त्रयात आर्थिक ग्वाहालि

येँ – सुखावति मल्टि प्रोडक्सनपाखें नेपालभाषा संकिपा ख्यःया नांजाःम्ह कलाकार स्वतन्त्र संसार महर्जनयात छगू लाख न्यय्न्याद्वः तका दां आर्थिक ग्वाहालि याःगु दु । प्रोडक्सनपाखें वंगु छुं दिं ग्वसाः ग्वःगु ‘गुड फ्राइडे म्युजिकल इभनिंग’या नामं ग्वसाः ग्वःगु सांगीतिक ज्याझ्वलय् आर्थिक ग्वाहालि लःल्हाःगु खः ।

कलाकार महर्जन वंगु छुं दँ न्ह्यवंनिसें स्पाइनल ट्युमरं ग्रस्त जुयाच्वनादीगु दु । थनिं न्यादँ खुदँ न्ह्यः उगु ल्वचं कयाः लनेधुंकूम्ह वय्कःया लिपांगु इलय् हाकनं ल्वय् तच्वया वःगु खः । ल्वय् तच्वया वयेवं न्यासि वनेत हे थाकुया थौंकन्हय् ह्वीलचेयरय् जुइमाःगु अवस्था वःगु दु ।
प्रोडक्सनपाखें ग्वसाः ग्वःगु स्वक्वःगु कलाकार फुटसल कासा, समाजसेवी विश्वरत्न तुलाधर, एम्स इन्टरटेन्मेन्ट नापं सांगीतिक ज्याझ्वःया टिकट मियाः उठे जूगु ध्यबापाखें कलाकार महर्जनयात उगु आर्थिक ग्वाहालि लःल्हाःगु खः ।

प्रोडक्सनया नायः सुरेन्द्र तुलाधरं कलाकार महर्जनया मांयात उगु आर्थिक ग्वाहालि लःल्हानादीगु खः । नांजाःपिं म्येँ हालामिपिं भीम तुलाधर, बबिन प्रधान, जेम्स प्रधान, संजय श्रेष्ठ, यमन श्रेष्ठ, सुरेश प्रधानं सजेश मानन्धर, पुष्पराज शाक्य, कपिल कसपाल, किशोरकुमार शाही, भूपेन्द्र वज्राचार्य, निशा देसार, सरिता शाही, लसता जोशी, एन्जेला श्रेष्ठ, सोनी राजभण्डारीं थःपिनिगु लोकंह्वाःगु म्येँ न्यंकादीगु ज्याझ्वलय् नांजाःम्ह संगीतकार हरिशारण साय्मि, अन्ताज नकःमि, जिवित जल्मीं तुंगनाया सोलो प्रस्तुति बियादीगु खः ।

अथे हे ज्याझ्वलय् अभय डंगोल, गंगा अवाले, सुनिता डंगोलं हुलाप्याखं न्ह्यब्वयादीगु खः । उगु हे ज्याझ्वलय् प्रोडक्सनपाखें ग्वसाः ग्वःगु स्वक्वःगु नेवाः कलाकार फुटसल कासाय् विजयी जुयादीपिंत नांजाःम्ह हास्य कलाकार मदनकृष्ण श्रेष्ठ, नांजाःम्ह निर्देशक कलाकार गणेश साय्मिं सिरपाः व दसिपौ लःल्हानादीगु खः ।