सरकारया नीति तथा कार्यक्रम : स्वनिगः दुने प्यंगू उपसहर, वीरगञ्ज-येँ रेलमार्ग

येँ – राष्ट्रपति विद्यादेवी भण्डारीं शुक्रवाः संसदय् न्हूगु आर्थिक दँया नीति तथा कार्यक्रम न्ह्यब्वयादिल । संसदय् न्ह्यब्वयादीगु ६३ पृष्ठया नीति तथा कार्यक्रमय् नेपाल-भारत रेल संचालन यायेगु, नेपाः दुने पूर्व-पश्चिम रेलमार्ग निर्माण यायेगु, जलमार्ग छ्यलाः अन्तर्राष्ट्रिय व्यापारया निंतिं नेपाःया पानीजहाज संचालन यायेत कानूनी व्यवस्था यायेगु व भारतीय आन्तरिक जलमार्गय् स्वाइगु कथं कोसी, गण्डकी व कर्णालीइ जलमार्ग विकास यायेगु थज्याःगु योजनात न्ह्यब्वयादीगु खः ।

अथेहे न्हय्गूलिं प्रदेशय् औद्योगिक क्षेत्रया स्थापना, स्थानीय तहलय् औद्योगिक ग्राम स्थापना, पेट्रोलियम खानी व पत्थर अन्वेषण, नः खानीया उत्खनन, वासलय् आत्मनिर्भर जुइगु, सिमेन्टया निर्यात, प्रतिव्यक्ति विद्युत्त खपत ३ सय ५० किलोवाट घन्टा थ्यंकीगु, ३ हजार मेगावाट विद्युत राष्ट्रिय प्रसारण लाइनय् स्वाकेगु नं उगु नीति तथा कार्यक्रमय् दुथ्याकतःगु दु ।

थ्वहे दथुइ स्वनिगः दुने निर्माण यायेगु धकाः छुं छुं बुदाँत नीति तथा कार्यक्रमय् दुथ्याकातःगु दु । स्वनिगःया आदिवासीतय् निंतिं सरोकार जुइफुगु छुं छुं बुँदात थुकथं दु ः

१. स्वनिगः दुने प्यंगू आधुनिक उपसहर विकास यायेगु ज्या सुरु यायेगु । स्वनिगः नापं स्वाःगु उपयुक्त थासय् प्राथमिकताया साथ व्यवस्थित सहरीकरणया पूर्वाधार निर्माण यायेगु ।

२. वइगु आर्थिक दँय् रसुवागढी-येँ रेलमार्ग व वीरगञ्ज-येँ रेलमार्ग निर्माणया प्रारम्भिक ज्या सुरु यायेगु ।

३. यलया गोदावरीइ ३ हजार व रुपन्देहीया बुटवलय् १ हजार २ सय मनूतय् क्षमता दुगु अत्तर्राष्ट्रिय सभाहल निर्माया ज्या अन्तिम चरणय् थ्यंगु दु । वइगु आर्थिक दँय् थुपिं सभाहलत संचालनय् वइ । ख्वपया सानो थिमिइ ५ हजार क्षमताया स्थायी आधुनिक सभाहल निर्माण ज्या सुरु यायेगु ।

४. येँ-तराई मधेश द्रुतमार्ग निर्माण ज्या न्ह्यःने यंकेगु । थ्व द्रुतमार्गया निर्माण वइगु स्वदँया दुने सम्पन्न यायेगु । वइगु आर्थिक दँय् थुगु सतकय् लाइगु जटिल प्रकृतिया पुल व सुरुङ निर्माण ज्या प्रारम्भ यायेगु ।

५. मेलम्ची खानेपानी आयोजनापाखें याकनं येँ लः हयेगु कथं कार्यान्वयनयात तीब्रता बीगु । वइगु आर्थिक दँया दुने आयोजनाया सम्पूर्ण निर्माण ज्या सम्पन्न यायेगु ।

६. येँ-पोखरा-लुम्बिनी, येँ मेट्रो, भारतीय सीमापाखें नेपाःया महत्वपूर्ण औद्योगिक व व्यापारिक क्षेत्र स्वाकेगु व चीन व भारतं येँ स्वाइगु रेलमार्ग निर्माण ज्याया प्रारम्भिक अध्ययन सम्पन्न जूगु दु ।

७. येँया चोभारय् निर्माणाधीन सुक्खा कन्दरगाह निदँया दुने संचालनय् हयेगु ।

८. सरकारं स्वच्छ नेपाल अभियान संचालन याइ । प्रदेश व स्थानीय तहया सहभागिताय् स्वनिगः, महानगरत व प्रदेश राजधानीयात हरित सहरय् रुपान्तरण यायेत सहरी वृक्षारोपणयात व्यापक दयेकेगु ।