वीपीडब्लु नेपालया ५० क्वःगु वार्षिकोत्सव
येँ(नेपालभाषा टाइम्स)÷फेडरेसन अफ विजनेस एण्ड प्रोफेसनल वुमन नेपाल (वीपीडब्लु नेपालं) थःगु ५० क्वःगु वार्षिकोत्सव छगू ज्याझ्वः यासें हंगु दु । मिसा शक्तिकरण व समृद्ध नेपालया निंतिं न्यागू दशक न्ह्यवंनिसें क्रियाशील संस्थां थःगु स्वर्ण महोत्सव हंगु खः ।
इन्टरनेशनल फेडरेसन अफ विजनेस एण्ड प्रोफेसनल वुमन (वीपीडब्लु इन्टरनेशनल)या सदस्य तकं जुयाच्वंगु वीपीडब्लु नेपालया स्वर्ण महोत्सव ज्याझ्वलय् अन्तर्राष्ट्रिय संस्थाया अध्यक्ष डा. क्याथरिन बोशार्ट मूपाहांकथं झायादीगु खः ।
लैंगिक विभेद, भेदभाव, जातीय छुवाछुटया अन्त्य, साक्षरता अभिवृद्धि, प्रजनन स्वास्थ्य, मस्तय् सुसाःकुसाः यायेत हेरचाह केन्द्र चायेकेगु, देय्या प्यंगू औद्योगिक क्षेत्रय् डे केयर सेन्टर चायेकाः ज्या याना वयाच्वंगु दु ।
थुकथं हे मिसापिंत सीपमूलक, आयमूलक तालिम संचालन यायेगु नापं सन् २००२ निसें लघु उद्यम विकास नं संचालन याना वयाच्वंगु डब्लुवीपी नेपालं सन् १९८० निसें राष्ट्रिय व क्षेत्रीय स्तरय् नीति निर्माण व वकालतया निंतिं नं ज्या याना वयाच्वंगु दुुुसा थुकिया नापनापं मिसातय्गु संस्थाया दथुइ सहकार्य व संजाल निर्माण यानाः स्वास्थ्य सहकारी संस्थाया स्थापना यानाः थ्व क्षेत्रय् नं ज्या याना वयाच्वंगु दु । सन् १९७२ य् नेपाःया मिसा उद्यमी न्ह्यलुवा मय्जु अम्बिका श्रेष्ठं वीपीडब्लु नेपाल स्थापना यानादीगु खःसा थौंकन्हय् थुगु संस्थाया थीथी जिल्लाय् झिंस्वंगू च्याप्टर दु ।
LEAVE YOUR COMMENTS