वाणिज्य बैंकया नाफा अप्वयेवं अर्थमन्त्रालय व राष्ट्र बैंक झस्के जुल

येँ – वाणिज्य बैंकया नाफा अप्वयेवं अर्थ मन्त्रालय व राष्ट्र बैंक झस्के जूगु दु । वाणिज्य बैंकया नाफा अनावश्यक रुपं अप्वगु धासें अर्थ मन्त्रालय व राष्ट्र बैंक झस्के जूगु खः । वंगु आर्थिक दँय् जक २८ गू वाणिज्य बैंकं ५१ ऋर्ब २८ करोड तका नाफा कमे याःगु दु । गुगु कि वंगु दँया ९ स्वयां ९ अर्ब २१ करोड तका अथे धयागु २१.८९ प्रतिशतं अप्वगु खः ।

लगानी योग्य पुँजीया चरम अभाव, अर्थतन्त्रया मेगु परिसूचकत खास हे बांलाःगु संकेत क्यने मफयाच्वंगु इलय् बैंकतय् नाफा अप्वयेवं अर्थमन्त्री व गर्भनर झस्के जूगु खः ।बैंकतय्गु नाफा अप्रत्याशित रुपं अप्वयेवं छुं न्हिं न्ह्यः अर्थमन्त्री डा. युवराज खतिवडां पत्रकार सम्मेलन यानाः हे उकिया बारे पत्रकारतय्त जानकारी बियादीगु खः ।

पत्रकार सम्मेलनय् न्ववायेगु झ्वलय् वय्कलं ‘बैंकं सुपर नर्मल प्रोफित कमे यायेगु लकसपाखें व्यवसाय अप्वया वनाच्वंगु दु । आः बैंक जक नाफाय् वनिगु व मेगु व्यवसाय न्ह्याःवने मफइगु अवस्था जुइमखु, प्रतिस्पर्धा व स्तर अप्वया वनाः ब्याजदर म्हो जुयाः वनेमाः ।’
अर्थमन्त्रीया धापुयात राष्ट्र बैंकया गर्भनर नं समर्थन यायेगु यानाच्वंगु दु ।

गर्भनर डा् चिरञ्जीवी नेपाल अर्थ समितिया बैंकय् आर्थिक दँ २०७७÷०७८ सं निक्षेप व त्यासाय् ब्याजदर (स्प्रेड) दर ४.४ य् क्वकायेमाःगु खँ धयादीगु दु । थ्व स्वयां न्ह्यः ५ प्रतिशत दुगु स्पेड दर मौद्रिक नीतिं ४.५ क्वकायेमाःगु व्यवस्था याःगु दु । अर्थ मन्त्री व गर्भनर निम्हेस्यां बैकतय्त अप्वः नाफा कमे यायेगुलिं अंकुश तयेगु सूत्र कथं स्प्रेड दर कटौतीयात कयाच्वंगु दु ।

अर्थमन्त्री खतिवडां बैंक जक नाफाय् वनेगु व उगु हे बैंकं त्यासा कयाः व्यापार व्यवसाय यानाच्वंपिनिगु अवस्था धाःसा खास हे सुधार मजूगु धासें आः अज्याःगु अवस्था जुइ मजिउगु खँ कनादिल । अर्थमन्त्री खतिवडां उच्च ब्याजदरय् सरकारया ध्यान वनाच्वंगु धासें आः राष्ट्र बैंकं नं थुकियात कयाः ध्यान बीमाःगु खँ कनादिल ।

सम्बन्धित अर्थविदतय्सं नं बैंकतय्गु नाफाय् खनेदुगु तःधंगु अन्तरयात कयाः सचेत जुइमाःगु सुझाव बिउगु दु । विज्ञतय्सं बैंकतय्सं सामान्यतः व्यापार याइगु खःसां नं बैंकत अर्थतन्त्र प्रति जिम्मेवार जुइमाःगु सुझाव नं बिउगु दु । विज्ञपिंसं बैंकया नाफा छु गथे जुयाः अप्वःगु खः उकिया आधार मालेमाःगु खँय् नं बः बिउगु दु ।

विज्ञपिंसं कृषिइ लगानी यानाः नाफा कमे याःगु खःसा ला पाय्छि जूगु खँ धासें तर शेयर, छेँबुँ, व्यापारय् लगानी यानाः नाफा कमे याःगु खःसा थ्व उलि बांलाःगु मखु धकाः नं सुझाव बिउगु दु । तर बैंकरतय्सं धाःसा आम्दानी अप्वःसां नं लगानीया अनुपातय् आम्दानी म्हो जुयाच्वंगु खँ धायेगु यानाच्वंगु दु ।

विशेष यानाः अप्वः धयाथें वाणिज्य बैंकं थःपिंसं सहुलियत दरं बीमाःगु कृषि त्यासायात फयांफक्वः मबीगु कुतः यानाच्वंगु द्वपं नं अर्थ मन्त्रालय व राष्ट्र बैंकं वाणिज्य बैंकयात बीगु याना वयाच्वंगु दु ।वाणिज्य बैंकतय्सं कृषि क्षेत्रय् लगानी यायेगु स्वयां नं उकिया पलेसा राष्ट्र बैंकयात जरिवाना पुलेगु याना वयाच्वंगु दु ।