पाइपलाइनं डिजेल जक वइगु

येँ –  सञ्चालनया तयारी जुयाच्वंगु नेपाल–भारत पेट्रोलियम पाइपलाइनं डिजेल जक वइगु जूगु दु । सरकारं गौरवया आयोजना कथं न्ह्याकूगु भारतया मोतिहारि निसें नेपाःया अमलेखगञ्ज तकया थ्व पाइपलाइनं फुक्क कथंया पेट्रोलियम पदार्थ मवइगु खँ धाःगु दु । थ्व पाइपलाइनं आःयात डिजेल जक हयेत्यंगु कारण धाःसा नेपाल आयल निगमया क्षमता मदुगुलिं खः ।

निगमया पाइपलाइनं फुक्क कथंया पेट्रोल हयाः भण्डारण यायेगु क्षमता हे मदुगुलिं आःयात डिजेल जक हयेत्यंगु खः । थ्व पाइपलाइनं डिजेल लिसें पेट्रोल व हवाइ इन्धन नं हयेजिउ, तर निगमया अमलेखगञ्जय् च्वंगु डिपो भण्डारण यायेत गाक्क क्षमता मदु । निगमया कार्यकारी निर्देशक सुरेन्द्र कुमार पौडेलं भण्डारण क्षमता म्हो जूगुलिं हे सुरुइ डिजेल जक हयेत्यनागु खँ धयादीगु दु ।

वय्कःया कथं थ्व पाइपलाइनं चिकं वइबलय् प्यन्हुया दुने अमलेखगञ्जय् च्वंगु फुक्कं ट्यांकी जाइ । अमलेखगञ्जय् ६ हजार किलोलिटर पेट्रोल व १६ हजार किलोलिटर डिजेलया भण्डारण क्षमता दु । थ्व ट्यांकी प्यन्हु दुने हे जाइगु जूगुलिं थुकिया वितरण निगमयात आः दकलय् तःधंगु हाथ्या जुयाच्वंगु दु ।

निगमं सुरुइ डिजेल जक हःसां बुलुहुं भण्डारण क्षमता अप्वयेकाः पेट्रोल व हवाइ इन्धन नं पाइपलाइन मार्फत हयेगु खँ धाःगु दु । थुकिया निंतिं पाइपलाइनयात चितवनया लोथर तक विस्तार यायेगु व थन हे मेगु भण्डारणस्थल दयेकेगु योजना दयेकातःगु दु । थुकिया लिसें निगमं न्हय्गुलिं प्रदेशय् भण्डारण क्षमता अप्वयेकेगु योजना नं दयेकातःगु दु ।

लोथर तक पाइपलाइन विस्तारया निंतिं अध्ययन क्वचायेधुंकूगु खँ निगमं धाःगु दु । आः अमलेखगञ्ज तक थ्यंगु पेट्रोल पाइपलाइनं असारं निसें हे डिजेल हयेत्यंगु दु । पाइपलाइनं चिकं हयेगु सुरु जुल धायेवं निगमया लागत नं म्हो जुइगु जूगु दु । पाइपलाइनया कारणं जक निगमया दँय् निगू अर्ब ढुवानी खर्च बचे जुइ । निगमं थुकियात चिकंया भावय् समायोजन यायेगु खँ धयाच्वंगु दु ।

 

सम्बन्धित बुखँ

LEAVE YOUR COMMENTS