एमाले–माओवादी एकता छाय् थाकुल ?

नेपाःया निगू ततःधंगु कम्युनिष्ट पार्टीत एमाले व माओवादी एकता यानाः नेपाल कम्युनिष्ट पार्टी दयेकेगु ज्या जुसांनिसें हे देशय् यक्व हिउपाः वइ, नेता व कार्यकर्तात उत्साहित जुइ, सरकारयात ज्या यायेत अःपुइ, जनतां हिउपाः वःगु महसूस याये खनी, कम्युनिष्ट अवधारणा कथं ज्या जुइ धकाः यक्वसिनं आशा याःगु खः ।

नेकपाया हे अध्यक्ष केपी ओली देय्या प्रधानमन्त्री जूगु दछि फूगु दुसा दछिया दुने नं खास याना जनतायात हिउपाःया महसुस याके फयाच्वंगु मदुनि । नेकपाया हे नेता कार्यकर्तात तकं सन्तुष्ट जूगु खने मदुनि । सरकारं नं मेमेगु देय्लिसे स्वापू बांलाकेगु ज्या जूगु, ततःधंगु योजना संचालन जूगु धइगु बांलाःगु खँ खः अले जनताया समृद्धि व विकासया नितिं ज्या जुयाच्वंगु दु धकाः दावी यायेगु बाहेक मेगु जुयाच्वंगु मदु ।

कम्युनिष्ट पार्टीया सरकार जूगु ल्याखं शिक्षा, स्वास्थ्यया सेवा जनतां अःपुक काये खनी लाकि खनी मखु ? शिक्षा व स्वास्थ्यय् झन ब्यापारीकरण जकं जुया मवंला धकाः न्ह्यसः तयेगु यानाच्वंगु दु । ओली सरकारबारे थुज्वःगु टिप्प्णी जुयाच्वंगु दुसा सरकार नापनापं स्वाना वयाच्वंगु विषय धइगु निगू पार्टी एकताया प्रसंग नं खः ।

तत्कालीन एमाले व माओवादी निगू पार्टी एकता यानाः नेपाल कम्युष्टि पार्टी (नेकपा) घोषणा याःगु थनिं गुला न्ह्यः हे खःसा पार्टीयात सांगठनिक एकता यायेगु ज्या धाःसा आः तक नं नेतातय्त थाकुयाच्वंगु दु । तत्कालीन एमालेया अध्यक्ष केपी ओली व माओवादीया अध्यक्ष पुष्पकमल दाहाल निम्हं अध्यक्ष यानाः न्हूगु पार्टी नेकपा घोषणा याःगु इलय् मनूत अजूचाःगु खः ।

निगू दलया नेता कार्यकर्तातय्गु पार्टी एकता व सांगठनिक एकताया सवालय् थःथःगु हे कथंया विश्लेषण, विमतिनिसें असन्तुष्ट दयाच्वंगु अवस्था खः । उकिं थौंया इलय् नेकपाया नेतृत्वयात सांगठनिक एकता यायेत थाकुयाच्वंगु खः ।

छगू हे पार्टीइ निम्ह अध्यक्ष अले छम्ह प्रधानमन्त्री नापं अध्यक्ष अले मेम्ह अध्यक्ष जक जुयादीगुयात अर्थ छु खः धकाः न्ह्यसः मतःगु मखु । गुलि गुलिसिनं आः संविधान संशोधन यानाः निम्हं प्रधानमन्त्री दयेकूसां जिउ नि धकाः नं धयाहःगु खः । उगु इलय् खुगू बुँदाया घोषणा पत्र जारी यानाः थःपिनिगु लक्ष्य जनतायात सुखी व समृद्ध यायेगु खः धयादीगु खः ।

पुनर्गठित नेकपाया तत्कालीन ज्याझ्वः समाजवाद उन्मुख जनताया जनवाद धाःगु खः । तत्कालीन एमालें जनताया बहुदलीय जनवाद व माओवादीं २१ औं शताब्दीया जनवाद धया वयाच्वंगु अवस्थाय् आः मेगु महाधिवेशनय् थ्व निगुलिं हे विषययात बहसय् यंकेगु धाःगु खः ।
पार्टी एकताया झ्वलय् निम्ह अध्यक्ष धुंकाःया दकलय् शक्तिशाली निकाय धइगु केन्द्रीय सचिवालय खः । केन्द्रीय सचिवालयय् गुम्हेसिया दयेकूगु खः ।

उकी माधव नेपाल, झलनाथ खनाल, वामदेव गौतम, नारायणकाजी श्रेष्ठ, ईश्वर पोखरेल, रामबहादुर थापा बादल व बिष्णु पौडेल च्वनादीगु खः । अथे हे स्थायी समितिइ पीन्याम्ह दुजः दइगु व उकी एमालेपाखें २६ म्ह, माओवादीपाखें १९ म्ह तःगु खः । लिसें तत्कालीन एमालेपाखें २४१ व माओवादीपाखें २०० यानाः ४४१ म्हेसिया केन्द्रीय कमिटी नं घोषणा याःगु खः ।

अले एकीकृत पार्टीया फुक्क कमिटी गठन स्वलाया दुने क्वचायेकेगु जुइ नं धाःगु खः । स्वलां पार्टीया सांगठनिक एकता यायेगु धकाः घोषणा याःगु जूसां थौं गुला दयेधुंकलं नंं पार्टीयात क्वंनिसें एकता याये फयाच्वंगु मदु । सांगठनिक एकताया नितिं धकाः ला स्वंगू कार्यदल तकं दयेकाः ज्या यायेधुंकल ।

न्ह्याक्व हे कार्यदल दयेकाः ज्या याःसां अन्ततः एकता याये फयाच्वंगु मदु । समस्या वयाच्वंगु दु । न्हापा निगू पार्टीया कार्यकर्ता जुयाच्वंपिंत एकता यायेगु ज्या जुयाच्वंगु खनेमदु । निगू हे पार्टीया नेता कार्यकर्तातय्सं थःथःगु कथं हैसियतया माग यानाच्वंगु अले नेतृत्वयात दबाब बियाच्वंगु अवस्थाय् एकताया ज्या न्ह्याः वने मफयाच्वंगु खः ।

उकिं हाकनं एकताया नितिं माःगु पहल यायेत केन्द्रीय सचिवालययात भाला वःगु दु ।धात्थें तत्कालीन एमाले व माओवादीया सांगठनिक एकता च्वय् केन्द्रीय तह तक जूसां नं स्थानीय तहय् छाय् जुइ मफयाच्वंगु खः न्ह्यसः तयेगु यानाच्वंगु दु । छुं महिना न्ह्यः ला प्रदेश स्तरीय कमिटी तकं घोषणा याःगु खः ।

अथे प्रदेश कमिटी घोषणा यायेवं ला पार्टी दुने झन हे असन्तुष्टी ब्वलना वल । उकिं यानाः झन हे समस्या वल । प्रदेश कमिटी दयेकेवं पार्टी दुने विवाद झन चर्के जुयावःगु महसूस याःगु दु । नेकपायात सांगठनिक एकता याये मफयाच्वंगु पार्टी दुनेया गुटबन्दी नापं थीथी कारणत दयेफु । तर प्रमुख कारण धाःसा न्हापा जनयुद्ध जुयाच्वंगु इलय् एमाले त्वःताः यक्व हे नेता कार्यकर्तात माओवादीइ वन

अले उमिसं पार्टी दुने छगू हैसियत कायम यायेधुंकूगु अवस्था दु । एमाले त्वःताः माओवादी जूपिं स्थानीय नेता कार्यकर्तातय्गु हैसियत न्हापा एमालेय् नेता जुयाच्वंपिं सिबें च्वय् अले उमिगु हे हाराहारीइ थ्यनाच्वंगु अवस्था खः । निगू पार्टी एकता जूगु अवस्थाय् एमालेया नेतातय्सं न्हापा थःपिनिगु हे पार्टीइ दुगु इलय् थम्हं हे दयेका तयापिं कार्यकर्तात आः थः सिबें च्वय् नेता जुयाः वइगु व थः बराबरया हैसियत कायम जुइगु जुयाः तत्कालीन एमालेया नेता कार्यकर्तातय्त तसकं ज्या मछिंगु अवस्था जुइफु ।

एमाले त्वःताः माओवादीइ वनाः आः हानं एकता प्रक्रियां दुहां वःपिंत न्हापांनिसें एमाले जुयाच्वंपिंसं अःपुक स्वीकार याये फयाच्वंगु मदु । म्हिगः जनयुद्धया इलय् छगू कथं एमाले व माओवादी दथुइ तःधंगु ल्वापु स्थानीय स्तरय् तकं जूगु कारणं नं थौं भावनात्मक एकता जुइ फयाच्वंगु मदु उमि दथुइ ।

स्थानीयस्तरय् स्वल धाःसा आः तक नं एमाले व माओवादी थःथःगु कथंया गुट जुयाच्वंगु दु । छगू गुटयात मेगु गुटं अस्वीकार यानाच्वंगु दु । तत्कालीन एमालेतय्सं माओवादी धइगु सुरक्षाया नितिं जक थःपिंलिसे एकता जूवःगु तायेकाच्वंगु दु । अले तत्कालीन माओवादीतय्सं धाःसा एमालेत धाइपिं ला परिवर्तनयात स्वीकार मयाइपिं अले थःपिंसं यानाः जबर्जस्ती रुपं जक परिवर्तनय् वःपि धकाः थुइकाच्वंगु दु ।

थुगु ल्याखं निगू दलया नेता कार्यकर्तातय्गु पार्टी एकता व सांगठनिक एकताया सवालय् थःथःगु हे कथंया विश्लेषण, विमतिनिसें असन्तुष्ट दयाच्वंगु अवस्था खः । उकिं थौंया इलय् नेकपाया नेतृत्वयात सांगठनिक एकता यायेत थाकुयाच्वंगु खः । कन्हय् वनाः जबर्जस्ती रुपं यात धाःसा पार्टी हे चले मजुइगु अवस्था वइगु खः ला धइगु सवालय् नं नेतृत्वया ग्याःचिकु पहः दु ।

नेतातय्सं धायेगु यानाच्वंगु दु कि पार्टीयात सांगठनिक एकीकरण मयाकेत तःधंगु शक्ति लगे जुयाच्वंगु दु । थुकिया अर्थ मेमेगु राजनीतिक पार्टीतय्सं वा मेगु शक्तिं यानाः समस्या जुयाच्वंगु धाल धाःसा नेता कार्यकर्तातय्सं स्वीकार याये फइगु जुयाः हे नेतातय्सं अथे धयाच्वंगु खः ।

नेकपाया सांगठनिक एकता मजुयाच्वंगु धइगु मेगु कारणं मखु थःपिनिगु हे कारणं खः, थःपिनिगु हे ब्यवहार, थःपिनि हे कार्यकर्ताया कारणं खः धकाः थुइका उकियात समाधान यायेगु लँपुइ मवंतले धाथें सांगठनिक रुपं एकता यायेत नेतृत्वयात अःपुइ मखु ।

सम्बन्धित बुखँ

LEAVE YOUR COMMENTS