तोखाय् पुनःनिर्माणय् सुस्तता

येँ – तोखा नगरपालिकाय् पुनःनिर्माणया ज्या सुस्त गतिं जक न्ह्याः वनाच्वंगु दु । भुखाय् ब्वःगु स्वदँ फुइ त्ययेकाः नं थनया निजी आवास पुनःनिर्माणं खास हे गति काये फयाच्वंगु मदु । तोखाय् आतकया दुने २१ प्रतिशत जक पुनःनिर्माणया ज्या जूगु सीदुगु दु ।

तोखा नगरपालिकाया उपप्रमुख ज्ञानमाया डंगोलया कथं नगर दुनेया बस्तीइ म्हो क्षेत्रफल दुगु, बहुस्वामित्व व आपालं पुलांगु छेँया पूर्जा मदुगु नापं क्षतिग्रस्त छेँ थुनेबलय् संधियारया छेँयात नं क्षति जुइगु सम्भावना दुगुलिं अज्याःगु छेँयात छु यायेगु धइगु स्पष्ट नीति मदुगुलिं पुनःनिर्माणया अभियानं गति काये मफुगु खः ।

तोखा नगरपालिका दुने जक २०७२ सालया तःभुखाचं १,७४५ खा छेँ पूर्णरुपं क्षति जूगु तथ्यांक दु । उकीमध्ये आतकया दुने ५३५ खा छेँथुवालं जक स्वंगूगु किस्ताया ध्यबा बुझे याना कायेधुंकूगु नं उपप्रमुख डंगोलं कनादिल ।

तोखाय् न्हापांगु किस्ता काःपिं लाभग्राहीया ल्याः ५७६ व निगूगु किस्ता काःपिं लाभग्राहीया ल्याः ७३७ दुसा न्हापांगु किस्ता कयाः नं समस्या क्यनाः छेँ दने मफुम्ह छम्हेसिनं किस्ताया ध्यबा लित बिउगु खः । नगरपालिका दुने पूर्णरुपं क्षति जूगु स्वंगू ब्वनेकुथिया पुनःनिर्माण धाःसा सिधयेधुंकूगु दु ।