ने. सं. ११४३ ञलाथ्व चतुर्दशी -

जनसंख्या म्हो जूसा सरकारी भाषाया मान्यता मदयेफु

येँ- प्रदेशया सरकारी भाषा छु छु दयेकेमाः धकाः भाषा आयोगं बिउगु सिफारिस कन्हय् वनाः संशोधन नं जुइ फइगु खँ धाःगु दु । आयोगं हे बिउगु प्रतिवेदनय् थ्व सिफारिस सदांया लागिं मखु धयातःगु दु ।
सिफारिसया ५.६ नम्बर बुँदाय् धयातः कथं कन्हय् वनाः जनसंख्याया तथ्यांक च्वय् क्वय् जुल धाःसा उकिया हे आधारय् थ्व सिफारिस पुनरावलोकन व संशोधन समेत जुइ फइगु खँ धयातःगु दु ।

भाषा आयोगं थ्व सिफारिस तयार यायेगु लागिं वि.सं. २०६८ सालया राष्ट्रिय जनगणनाया तथ्यांकयात आधार दयेकूगु खः । उकिया हे आधारय् छु छु प्रदेशय् छु छु भाय् ल्हाइपिं वक्ता गुलि दु धइगु खँयात आधार दयेकाः तत्तत् प्रदेशय् थीथी भाषाया सिफारिस याःगु खः । छुं जुयाः भविष्यय् जुइगु जनगणनाय् भाय् ल्हाइपिं मनूतय् ल्याः च्वय् क्वय् जुल धाःसा थ्व सिफारिस नं संशोधन जुइ फइगु खँ धयातःगु दु । प्रतिवेदनय् धयातःकथं जनगणनाया आधारय् प्रदेश व स्थानीय तह निगुलिं थाय्या सरकारी भाय् हिलाबुला जुइगु सम्भावना दु ।

तर विज्ञतय्सं धाःसा छगू इलय् छता भाय्यात सरकारी छ्यलाबुलाया भाय् धकाः मान्यता बीधुंकाः हानं मेगु झिदँ लिपा छुं नं कारण क्यनाः मेगु हे भाय्यात छ्यलाबुलाया भाय् कथं मान्यता बीगु व्यवहारिक मजुइफु ।

नापं गुगुं नं थासय् छु भाषायात सम्पर्क भाषा दयेकेगु धइगु खँ उगु थाय्या भाषिक पहिचानलिसे समेत स्वानाच्वंगु विषय जूगु कारणं तथ्यांकया आधारय् उकियात हिलाबुला याये मजिउगु खँ नं धयाहःगु दु ।

अथे खःसां राष्ट्रिय जनगणना न्ह्यःने वयाच्वंगु थ्व इलय् आः नेवाः लगायत थीथी आदिवासी जनजातितय्सं गणनाय् थःगु मांभाय् स्पष्ट रुपं किटान यायेमाःगु खँय् सचेत जुइमाःगु बिचाः नं थन तया हःगु दु । जनगणनाय् थुगुसी भाषा सम्बन्धी जक स्वंगू न्ह्यसः तयातःगु दु ।