५ नम्बर राधानी व प्रदेशया नां क्वःजित

येँ (नेपालभाषा टाइम्स) – प्रदेश नं. ५ या स्थायी राजधानी भालुवाङय् तयेगु व प्रदेशया नां लुम्बिनी तयेगु प्रस्ताव प्रदेशसभां दुई तिहाइ बहुमत पारित जूगु दु। म्हिगः जूगु मतदानय् प्रस्तावया पक्षय् ६९ मत लाःगु खः । थ्व मत प्रदेशसभाया दुई तिहाइ बहुमत खःसा प्रस्तावया विपक्षय् १३ मत लाःगु दु ।

प्रदेश सरकारं दाङया भालुवाङ बजारयात केन्द्रय् तयाः राप्ती व गढवा गाउँपालिका लिसे अर्घाखाँचीया शीतगंगा नगरपालिका स्वानाः स्थायी राजधानी दयेकेगु प्रस्ताव वंगु असोज १६ गते प्रदेशसभाय् पेश याःगु खः । उकिया विरोधय् प्रमुख विपक्षी नेपाली कांग्रेसया छुं सांसदपिसं सोमवाः प्रदेशसभाय् तोडफोड तकं याःगु खःसा कांग्रेसं उकिया विपक्षय् मतदान यायेत ह्वीप तकं जारी याःगु खः । तर कांग्रेसया छुं सांसदपिंसं म्हिगः पार्टीया ह्वीप उल्लंघन यानाः फ्लोर क्लस याःगु खः ।

प्रदेशसभाय् सत्तारुढ नेपाल कम्युनिष्ट पार्टी (नेकपा) या ६१ सांसद दुसा नेपाली कांग्रेसया १९ म्ह सांसद दु। अथे हे जनता समाजवादी पार्टीया खुम्ह व राष्ट्रिय जनमोर्चाया छम्ह सांसद दु। म्हिगःया बैठकय् सभामुख पूर्णबहादुर घर्ती धाःसा मतदान यानामदी । नेकपाया छुं सांसदपिंसं बुटवलय् राजधानी तयेमाः धकाः माग याःगु खःसां नं नेकपाया निम्ह अध्यक्षंपिंसं पार्टीया निर्णय कथं ह्वीप जारी यायेवं म्हिगः प्रस्ताव पारित जूगु खः ।