उद्यान निर्माणय् व्यस्त नगरपालिका

येँ देय् दुनेया थीथी नगरपालिकां सार्वजनिक जग्गा संरक्षण व उद्यान निर्माणया ज्या न्ह्याकूगु दु । थीथी झिगू नगरपालिकामध्ये सक्व (शंखरापुर) नगरपालिकां दकलय् अप्वः जग्गाय् उद्यान निर्माणया निंतिं याकनं बोलपत्र आह्वान यायेगु न्ह्यथंगु दु । उगु नगरपालिकां वडा नं. ९ या वज्रयोगिनी क्षेत्रय् हरित उद्यान निर्माणया निंतिं १०० रोपनी सार्वजनिक जग्गाया पहिचान तकं यायेधुंकूगु दु ।

उद्यान निर्माणया निंतिं धकाः वंगु आइतवाः येँ महानगरपालिकां छगू करोड तका दां बिउगु व उकिं मगात धाःसा नगरपालिकां हे ध्यबा थप यायेगु नगरप्रमुख सुवर्ण श्रेष्ठं जानकारी बियादिल । गोकर्णेश्वर नगरपालिका निगू करोडया लागतय् वडा नं. ९ व ४ या ३० रोपनी जमिनय् उद्यान निर्माण यायेगु नापं ज्येष्ठ नागरिकया निंतिं आराम कक्ष, रेलिङसहितया अपांगमैत्री पदमार्ग व मस्तय् निंतिं मनोरञ्जन स्थलतकं निर्माण यायेगु नगरप्रमुख सन्तोष चालिसें जानकारी बियादिल ।

वय्कःयाकथं निगू करोड लागतय् पार्क निर्माणया तयारी याःगु खः । उकिया निंतिं नं येँ मनपां छगू करोड तका दां वंगु आइतवाः बी धुंकूगु दुसा ल्यं दुगु ध्यबा नगरपालिकां हे व्यहोरे याइगु जूगु दु । थुकथं हे वडा नं. ३ या धाम क्षेत्रय् तारकेश्वर धाम निर्माण यायेगु तयारी तारकेश्वर नगरपालिकाया दु । झिपी जमिनय् निर्माण यायेत्यंगु उगु धामया निंतिं नगरपालिकां नं थ्व हे फागुनया अन्तिम वाःतकया दुने ज्या शुरु यायेगु नगरप्रमुख रामेश्वर बोहरां जानकारी बियादिल ।

वंगु आइतवाः येँ महानगरपालिकां जःखःया नगरपालिकायात नगर–नगर साझेदारी ज्याझ्वः अन्तर्गत सार्वजनिक जग्गाया पहिचान व उद्यान निर्माणया निंतिं प्रत्येक नगरपालिकायात छगू छगू करोड तका दरं ध्यबा लःल्हाःगु खः ।

वंगु आइतवाः येँ मनपां ग्वाहालि लःल्हाःगुलिइ तोखा नगरपालिका बाहेक मेगु दक्वं नगरपालिकां क्वःछिनातःगु इलय् ज्या शुरु यायेगु तयारी यानाच्वंगु खँ धाःगु दु । उगु नगरपालिकायात येँ मनपां थगुने हे मेमेगु नगरपालिका सरह ध्यबा लःल्हायेधुंकूगु खः । तोखा नगरपालिकायात वंगु असारया स्वंगूगु वालय् थुगु हे साझेदारी ज्याझ्वःकथं बालमैत्री उद्यान परियोजना साझेदारी सम्बन्धय् छगू करोड तका ग्वाहालि याःगु खः ।

कागेश्वरी मनोहरा नगरपालिकां नं वडा नं. १ या ५५ रोपनी जमिनय् पर्यटकीय कागेश्वरी धाम निर्माण याइगु जूगु दु । वडा नं. १, २ व १०यात तकं कःघानाः किपू नगरपालिकां ५५ रोपनी जग्गाय् युद्ध स्मारक पार्क निर्माण यायेत्यंगु खः । भुइजःसि (बुढानिलकण्ठ) नगरपालिकां वडा नं. ८ या १४ रोपनी जग्गाय् बुढानिलकण्ठ उद्यान निर्माण याइगु जूगु दु । डाँडापौवाय् गणेशमान स्मृति पार्क निर्माणया तयारीइ नागार्जुन नगरपालिका लगे जुयाच्वंगु दु ।

उगु पार्क १७ रोपनी सार्वजनिक जग्गाय् निर्माण यायेत्यंगु खः । चन्द्रगिरि नगरपालिकां वडा नं. १३ या ३६ रोपनीइ यइपुसे च्वंगु उद्यान निर्माण याइगु जूगु दुसा दक्षिणकाली नगरपालिकां नं वडा नं. ५ या गोरखनाथ देगःया जःखः अवलोकन स्तम्भ, बहुउद्देश्यीय उद्यान, झ्वाला, बालउद्यान, प्राचीन दक्षिणकालीस्थल तक परम्परागत स्वाहाने निर्माण याइगु जूगु दु ।

येँ महानगरपालिकां वंगु आइतवाः तोखा बाहेक गुंगू नगरपालिकायात छगू छगू करोडया दरं ध्यबा लःल्हाःगु खः । येँ मनपाया प्रमुख विद्यासुन्दर शाक्यं गुगु शीर्षकय् ग्वाहालि ध्यबा लःल्हाःगु खः, व हे कथं क्वःछिनातःगु ईया दुने विकासया ज्या क्वचायेकेत इनाप यानादीगु दु ।

आर्थिक ग्वाहालि प्राप्त याःगु दक्वं नगरपालिकां आर्थिक दँ ०७५÷७६या ज्या शुरु यानाः आर्थिक दँ ०७६÷७७ य् सम्पन्न यानाः प्रयोगय् तकं हयेमाःगु सम्झौता पती न्ह्यथनातःगु दु । सम्झौताकथं निगूगु पक्ष अर्थात नगरपालिकातय्सं न्हापांगु पक्ष माने यानातःगु येँ महानगरपालिकायात इलय्व्यलय् परियोजना निर्माण सम्बन्धय् जुयाच्वंगु प्रगतिया विवरण उपलब्ध याकेमाःगु जुइ । ध्यबा प्राप्त याःगु बखतय् परियोजनाया नमूनाकथं निर्माणया ज्या न्ह्याकेमाःगु येँ मनपां न्ह्यथंगु दु ।