नेकपा विभाजन मुद्दा भण्डारीं स्वइगु

येँ – सत्तारुढ नेकपाया आधिकारिकता विवाद ज्यंकेगु जिम्मा न्हू नियुक्ति जूम्ह आयुक्त रामप्रसाद भण्डारीयात बिउगु दु । वंगु माघ २१ गते शपथ ग्रहण याःम्ह आयुक्त भण्डारीयात राजनीतिक दल तथा दल विभाजन सम्बन्धी निर्णय यायेगु जिम्मेवारी बिउगु खः ।

सूत्रया कथं लिपांगु इलय् दाहाल–नेपाल पुचलं निर्वाचन आयोगय् लःल्हाःगु पौ भण्डारीं अध्ययन यायेधुंकूगु दु । भण्डारीं नियमित प्रक्रिया अन्तर्गत थ्व जिम्मेवारी काःगु खँ धाःगु दु । न्हापा स्वम्ह आयुक्तं याना वयाच्वंगु ज्या ऐन कथं न्याम्हेसित इनाबिउगु दु । कानुनी पृष्ठभूमि नं दुगुलिं भण्डारीयात दल विभाजन सम्बन्धी जिम्मेवारी बिउगु खः । आयोग सूत्रया कथं नेकपा पार्टी विभाजन सम्बन्धी निर्णय धाःसा आयुक्ततय् मंकाः बैठकं याइ । यदि छुं विवाद वल धाःसा बहुमतं निर्णय याइगु व मत बराबर जुल धाःसा प्रमुख निर्वाचन आयुक्तं भोट बीगु जुइ ।

आयुक्त भण्डारी लगायत संवैधानिक निकायय् प्रधानमन्त्रीं ओलीं नियुक्त याःपिं ३२ म्ह विरुद्ध सभामुख अग्निप्रसाद सापकोटां सर्वोच्च अदालतय् दर्ता याःगु मुद्दा विचाराधीन जुयाच्वंगु दु ।