दायाः स्याःगु कि कोरोनां सीगु ?

येँ (नेपालभाषा टाइम्स) – थनया भद्रगोल जेलय् कुनातःम्ह बन्दी रामलखन जैसवाल सीगु खँकयात कयाः विवाद पिहां वःगु दु । जेल प्रशासनं जैसवाल कोरोनां कयाः सीगु दावी यानाच्वंगु दुसा वया छेँजःपिंसं वयात जेल दुने दायाः स्याःगु द्वपं बियाच्वंगु दु ।

जैसवालयात वीर अस्पतालय् मृत घोषित याःगु खःसा वया छेँजःपिंसं म्हिगः वीर अस्पताल पिने हे धर्ना बिसें जैसवालयात जेल दुने स्यानाःलि अस्पताल हःगु जूगुलिं थुकिया छानबिन यायेमाः धकाः माग याःगु दु । जैसवाल कोरोनां कयाः सीगु धासें छेँजःपिंत लाशया लिक्क वने मबिउगु खःसां वया म्ह्याय्म्ह जबर्जस्ती लाशया न्ह्यःने वनाः स्वःबलय् अन थीथी थासय् फ्वं गायाच्वंगु खँ धाःगु दु । उमिगु धर्नां यानाः म्हिगः वीर अस्पताल लागा तनावग्रस्त जूगु खःसा छेँजःपिंसं लाश उठे यायेत नं अस्वीकार यानाच्वंगु दु ।