ख्वपय् नेवाः लिपि व भाषा अनिवार्य

ख्वप –  ख्वप नगरपालिकाया मेयर सुनिल प्रजापतिं आः ख्वप नगर दुनेया फुक्कं स्कुलय् रञ्जना लिपि, प्रचलित नेपाल लिपि व नेपालभाषायात अनिवार्य रुपं लागू यायेगु खँ कनादीगु दु । समाज सुधार माविया पीच्याक्वःगु बुदिंया लसताय् स्कुलया न्हूगु भवन माहेश्वरीइ जूगु ज्याझ्वलय् मूपाहांया थासं न्ववासें वय्कलं नेवाः जातिया मू म्हसीका धइगु हे भाषा व लिपि जूगु लिसें थ्व नेपाःया नं म्हसीका जूगुलिं ख्वपया फुक्कं स्कुलय् थुकियात अनिवार्य यानाः ब्वंकेत्यनागु खँ कनादिल ।

मेयर प्रजापतिं शहीद, राजनीतिक न्ह्यलुवा व ख्वपया किसान आन्दोलनया विषयय् स्थानीय पाठ्यक्रमय् अनिवार्य कथं दुथ्याकाः पुर्खा प्रति गौरव यायेमाःगु खँ नं वय्कलं कनादिल । प्रदेश सभाया सांसद सुरेन्द्रराज गोसाईनं ३ नम्बर प्रदेश सरकार लुट, भ्रष्टाचार व खञ्चुवा जूगु द्वपं बिसें अनया संसदय् ख्वपयात राजधानी यायेगु थेंज्याःगु घोर संघीयता विरोधी व विकासया खँ पिकयाः नेमकिपां न्यय्दँ न्ह्यवंनिसें यानाच्वंगु शिक्षा, स्वास्थ्य व विकासया ज्यायात अपमान यानाच्वंगु बिचाः प्वंकादिल । वय्कलं म्हिताः म्हिताः सयेकेगु व सयेकु सयेकुं म्हिते दइगु मस्तय्गु अधिकारयात अभिभावकं सम्मान यायेमाःगु खँ नं कनादिल ।

विद्यालय व्यवस्थापन समितिया नायः कृष्णसागर बासीया अध्यक्षताय् जूगु ४८ क्वःगु स्थापना दिवस, एसइई परीक्षाय् ताःलाःपिं विद्यार्थीतय्त पदक इनेज्या व सांस्कृतिक ज्याझ्वलय् विद्यालयया पुलांम्ह शिक्षक राम प्रजापतियात मूपाहां प्रजापतिं दोसल्लां न्ययेकाः हनेज्या याःगु खःसा ज्याझ्वलय् सम्मानित शिक्षक प्रजापति व नेपाल क्रान्तिकारी शिक्षक संघया केन्द्रीय कोषाध्यक्ष चक्रबहादुर चाकतुं न्वावनादीगु खः ।

 

सम्बन्धित बुखँ

LEAVE YOUR COMMENTS