प्रदेश १ य् पहिचानवादीलिसे वार्ता

येँ (नेपालभाषा टाइम्स)- १ नम्बर (कोशी) प्रदेश सरकार व प्रदेशया नां पहिचानया आधारय् तयेमाः धकाः आन्दोलन याना वयाच्वंगु पुनः नामाकरण संघर्ष समिति दथुइ न्यागू बुँदे सहमति जूगु दु । निगुलिं पक्षया वार्ता पुचः दथुइ म्हिगः जूगु वार्ताय् संविधान सम्मत ढंगं प्रदेशया पुनःनामाकरण यायेत मंकाः कथं राजनीतिक लकस दयेकेगु सहमति जूगु खः । ्

सहमतिइ पहिचान पक्षं निषेधया आन्दोलन लित कयाः शान्तिपूर्ण आन्दोलन यायेगु, आन्दोलनय् घाःपाः जूपिं आन्दोलनकारीतय्त प्रदेश सरकारं निःशुल्क वासः यायेगु, उमित तयातःगु राजनीतिक मुद्दा प्रदेश सरकारं लित कायेगु व फागनु १० गते स्वयां न्ह्यः हे निगुलिं पक्षया सहमतिइ हाकनं वार्ताया मिति क्वःछीगु सहमति जूगु खः ।
वार्ता लिपा संघर्ष समितिया संयोजक डेकेन्द्र सिंह थेगिमं वार्ता सकारात्मक जूगु धासें प्रदेश व संघीय सांसदयात थःगु जिल्ला व निर्वाचन क्षेत्र वनेत तयातःगु प्रतिबन्ध लितकायेगु खँ धयादीगु दु ।

निगू पक्ष दथुइ म्हिगः जूगु न्यागू बुँदे सहमति लिपा १ नम्बर प्रदेशय् शान्तिपूर्ण राजनीतिक वातावरण ब्वलंगु खँ मुख्यमन्त्री केदार कार्कीं धयादीगु दु ।

वंगु बिहीवाःनिसें न्ह्याःगु निगू पक्षीय वार्ताय् सरकारपाखें वार्ता पुचःया संयोजक लिसें भौतिक पूर्वाधार विकास मन्त्री कमलप्रसाद जबेगुया नेतृत्वय् पर्यटन, वन तथा वातावरण मन्त्री गणेश उप्रेती व आन्तरिक मामिला तथा कानुन मन्त्रालयया सचिव लक्ष्मीप्रसाद पौडेल वार्ताय् च्वनादीगु खः ।

उकथं हे आन्दोलनकारी पक्षपाखें पहिचान सहित प्रदेश नम्बर १ पुनःनामांकन अभियानया अध्यक्ष डेकेन्द्र सिंह थेगिमलिसें थीथी जातीय पार्टी, आदिवासी जनजाति महासंघया प्रतिनिधि व राजनीतिक पार्टीया नेतात दुथ्याःगु खः ।

थ्व स्वयां न्ह्यः तत्कालीन मुख्यमन्त्री हिक्मतबहादुर कार्कीया कार्यकालय् वंगु असार ४ गते सरकार व आन्दोलनकारी दथुइ वार्ता जूगु खःसा उगु वार्ता छुं हे निष्कर्ष पिमकासे क्वचाःगु खः । वंगु फागुन १७ गते प्रदेशसभां प्रदेशया नां ‘कोशी’ पारित यायेवं पहिचान पक्षधरतय्सं आन्दोलन याना वयाच्वंगु खः । आन्दोलनया झ्वलय् प्रहरी दमनय् लानाः पदम लिम्बु सीवं आन्दोलन तझ तच्वःगु खः ।

मन्त्रिमण्डल विस्तार
थ्वहे झ्वलय् म्हिगः प्रदेश १ या मुख्यमन्त्री केदार कार्कीं मन्त्रिमण्डल विस्तार यासें प्यम्ह मन्त्री व निम्ह राज्यमन्त्री तनादीगु दु । थुकिया लिसें आः प्रदेशय् मन्त्रीतय् ल्याः झिम्ह थ्यंगु दु । सत्ता गठबन्धन व एमालेया समेत समर्थन दुगुलिं सन्तुलन यायेत मुख्यमन्त्री कार्कीयात थाकुयाच्वंगु दु ।