नेकपा एकताया प्रतिवेदन लःल्हात

येँ – नेकपाया क्वय्या कमिटीत नं एकता याना यंकेगु ताः तयाः नीस्वंगु नेपाल कम्युनिष्ट पार्टीया कार्यदलं प्रतिवेदन लःल्हाःगु दु । सचिवालय दुजः रामबहादुर थापाया संयोजकत्वय् नीस्वंगु कार्यदलं सर्वसम्मतिं प्रतिवेदन तयार यानाः अध्यक्ष लिसें प्रधानमन्त्री केपी शर्मा ओलीयात लःल्हाःगु खः ।

संगठनात्मक एकता पूवंकेत वंगु पुस १२ गते नेकपाया स्थायी कमिटीं कार्यदल नीस्वंगु खः । झिंन्यान्हुया ई बियाः एकताया प्रस्ताव तयार यायेत कार्यादेश बिउगु खःसां नं कार्यदलं थ्यंमथ्यं निला लिपा प्रतिवेदन तयार यानाः लःल्हाःगु खः । आः पार्टीया निम्ह अध्यक्ष च्वनाः उगु प्रतिवेदन बारे सहलह यानाः सचिवालय व स्थायी कमिटीया बैठक च्वँसें एकता प्रक्रिया क्वचायेकीगु खँ धाःगु दु ।

कार्यदलं धाःसा सर्वसम्मन रुपं प्रतिवेदन लःल्हाःगु खँ धाःगु दु ।तत्कालीन एमाले व माओवादी एकता जुयाः नेपाल कम्युनिष्ट पार्टी (नेकपा) गठन जूसां क्वय्या कमिटीत धाःसा अझं गठन याये मफुनि । पार्टीं छुं ई न्ह्यः प्रदेश कमिटी गठन याःगु खःसा जिल्ला कमिटी अझं गठन याये मफुनि । थुकिं यानाः थौंकन्हय् प्रदेशं क्वय् नेकपाया पार्टी कमिटी धइगु हे मदयाः खाली जुयाच्वंगु दु ।