न्हूगु सरकार पुषय् जक

येँ (नेपालभाषा टाइम्स)- प्रतिनिधि सभा व प्रदेश सभाया निर्वाचनया लिच्वः थ्यंमथ्यं वयेधुंकूसां न्हूगु सरकारया गठन धाःसा पुस मथ्यंकं जुइगु सम्भावना मदु । निर्वाचन आयोगया कथं नं पुस मथ्यंक सरकार गठन जुइ फइगु सम्भावना मदु । आयोगं हे न्हूपिं निर्वाचित सांसदत संसदय् थ्यनेत म्होतिं नं मंसिर महिना कटे जुइगु खँ धाःगु दु ।
निर्वाचन आयुक्त रामप्रसाद भण्डारीं समानुपातिक– पाखेया अन्तिम लिच्वः वयेधुंकाः उकिया प्रतिवेदन तयार यायेत नं म्होतिं झिन्हु लगे जुइगु खँ धाःगु दु ।

प्रत्यक्ष निर्वाचनपाखें ला देय्न्यंकं त्यानावःपिं उम्मेदवारत निश्चित जुइधुंकूगु दु, तर समानुपातिकपाखें सु सु सांसद जुइ धयागु क्वःछीत ई काइगुलिं नं सरकार दयेके लिबाः वनेत्यंगु खः ।

प्रतिनिधि सभाय् ६० प्रतिशत सांसदत जक प्रत्यक्ष निर्वाचनपाखें वइ, ४० प्रतिशत सांसदत समानुपातिकपाखें वइगु खः । आः समानुपातिकया मतगणना क्वचायाः छु छु पार्टीपाखें गुलि गुलि सांसदत वइ धयागु ल्याःचाः जुइधुंकूसां उकिया आधिकारिक विवरण निर्वाचन आयोगं बिउगु मदुनि । आयोगया प्रवक्ता भण्डारीं आःतक वःगु
ल्याःचाः कथं गुगु पार्टीयात गुलि सिट दइ धयागु सीदुसां निर्वाचन अधिकृत जुयाः वंपिंसं थःथःपिनिगु क्षेत्रया मतपरिणामया लिच्वः हस्ताक्षर यानाः मबिउतले आयोगं आधिकारिकता बीमखुनि । थथे हस्ताक्षर यानाः वयेधुंकाः जक आयोगं छु पार्टीं ग्वःम्ह सांसद जुइ धयागु क्वःछी । थ्व धुंकाः छगू पार्टी लिंग व समुदायया निंतिं आरक्षित सिटपाखें ग्वःम्ह ग्वःम्ह सांसद छ्वया हयेमाः धयागु क्वःछिनाः दलतय्त पौ छ्वइ । थ्व पौ वःगु न्हय्न्हु दुने दलतय्सं बन्द सुचीइ दुथ्याःपिंपाखें सांसद दयेकीपिनि नां छ्वया हइ । थथे छ्वयाहःगु नामय् नं सच्चे यायेत थप स्वन्हुया ई बी । अले जक आयोगं निर्वाचनया अन्तिम लिच्वः राष्ट्रपतियात लःल्हाइ । थ्व प्रक्रिया पूवंकेत हे थप झिन्हु–झिंनिन्हु लगे जुइगुलिं आयोगं मंसिर मसान्त तकया दुने जक राष्ट्रपतियात अन्तिम लिच्वः लःल्हायेफइगु खनेदु । उकिं पुस मथ्यंकं न्हूगु सरकार गठन जुइफइगु सम्भावना मदुगु खः ।

मेखे थुगुसी छुं नं पार्टीया बहुमत मवःगुलिं नं सरकार दयेकेत अझ लिबाइगु खनेदु । छगू जक पार्टीया बहुमत वःगु जूसा तुरुन्त सरकार दयेके फइगु खः, तर सुयां बहुमत मवःगुलिं दलतय् दुने सरकार गठनया हे गठबन्धन यायेत नं ई काइगु खनेदु ।

निर्वाचनया लिच्वः ल्हातय् लायेधुंकाः राष्ट्रपतिपाखें संविधान कथं दकलय् तःधंगु पार्टीयात सरकार गठन यायेत आह्वान याइ । राष्ट्रपतिया आह्वान लिपा दकलय् तःधंगु दलं मेमेगु पार्टीलिसे गठबन्धन यानाः बहुमत खाकाः सरकार गठनया निंतिं वनी । आःया लिच्वः कथं कांग्रेसया नेतृत्वय् दुगु माओवादी, नेकपा एस, जनमोर्चा दथुया वर्तमान गठबन्धनया बहुमत खनेदुसां उमि दथुइ सुयात प्रधानमन्त्री दयेकेगु धयागु बारे एकमत मजूनिगुलिं नं सरकार दयेकेगु खँय् अझ अलमल जुइफुगु अनुमान जुयाच्वंगु दु ।

सम्बन्धित बुखँ

LEAVE YOUR COMMENTS