दीप्याखं आगंछेँया जग स्वनेज्या

येँ- यँयाः पर्वया छगू महत्वपूर्ण अंग जुयाच्वंगु दीप्याखंया थःगु हे आगंछेँ धस्वाकेत म्हिगः लग स्वनेगु ज्या जुल । येँ मनपाया मेयर विद्यासुन्दर शाक्य लिसें शहरी विकास राज्यमन्त्री रामवीर मानन्धर, सांसद कृष्णगोपाल श्रेष्ठ, उपमेयर हरिभा श्रेष्ठ खड्गी व दीप्याखंया नायः इन्द्र महर्जनं म्हिगः छगू पुजाया दथुइ आगंछेँया जग स्वनादीगु खः ।

उगु इलय् दीप्याखं प्रवद्र्धन तथा संरक्षण समितिया महासचिव मचाराजा महर्जनं दयेकादीगु उगु आगंछेँया नमूना नं अन उलेज्या जूगु खः ।
ज्याझ्वलय् न्ववासें मेयर शाक्यं आगंछेँ याकनं दयेके सिधयेकाः थःपिंसं हे उलेज्या याना वने दयेमा धकाः भिंतुना बियादिल । समितिया सहसंयोजक नातिकाजी महर्जनं लसकुस यासें न्ह्याःगु उगु ज्याझ्वलय् भैरव जुयाः प्याखं हुलादीम्ह बद्री महर्जन, कौशी तोषाखानाया हेमन्त निरौला, सहकोषाध्यक्ष नरेन्द्र महर्जन, १८ वडाया अध्यक्ष न्हुछेकाजी महर्जनपिंसं नं नुगःखँ तयादीगु खः ।

दँय्दसं प्याखं पिकायेमाःगु किलागःया बिज्यापूननिइ च्वंगु उगु छेँ समितिपाखें २ करोड तकां न्याना काःगु खःसा आः परम्परागत शैलीं करिब ७ करोड तकाया लागतं न्हूगु छेँ दनेत्यंगु खः । उकिया लागिं येँ मनपां १ करोड तका विनियोजन यायेधुंकूगु दु ।